हिंगोली :जिल्ह्यात मंगळवारी (ता.२२) सकाळी आठपर्यंतच्या २४ तासांमध्ये हिंगोली, डिग्रस कऱ्हाळे, कळमनुरी, नांदापूर, आखाडा बाळापूर, औंढा नागनाथ या ६ मंडळांमध्ये अतिवृष्टी झाली. ओढे, नाले, नद्यांना पूर आले. जमिनी खरडून गेल्यामुळे शेकडो हेक्टरवरील सोयाबीन, तूर, हळद, ज्वारी आदी पिकांचे अपरिमित नुकसान झाले.
हिंगोली जिल्ह्यात गेल्या पंधरवाड्यापासून पाऊस सुरु आहे. गेल्या काही दिवसांत वसमत तालुक्यात झालेल्या अतिवृष्टीमुळे कुरुंदा, गिरगाव आदी मंडळांतील अनेक गावातील पिकांचे खूप नुकसान झाले. मंगळवारी (ता.२२) पहाटे पाचच्या सुमारास हिंगोली तालुक्यातील सहा मंडळांमध्ये मुसळधार पाऊस झाला.
हिंगोली मंडळात सर्वाधिक ११४.५ मिलीमीटर पावसाची नोंद झाली. त्यानंतर डिग्रस मंडळात ६८ मिमी, नरसी नामदेव मंडळात ३२ मिमी, सिरसममध्ये २९ मिमी, माळहिवरात ३९.२ मिमी, खंबाळात २५ मिमी पाऊस झाला.
ओढे, नाले भरुन वाहिल्याने कयाधू नदीला पूर आला. कळमनुरी तालुक्यातील पाच मंडळांमध्ये मुसळधार पाऊस झाला. त्यापैकी तीन मंडळांत अतिवृष्टी झाली. कळमनुरी मंडळात सर्वाधिक ९४.३ मिलीमीटर, नांदापूर मंडळात ७४.३ मिमी,आखाडा बाळापूर मंडळात ६५ मिमी, वाकोडी मंडळात ४२.३ मिमी, वारंगा मंडळात ३६ मिमी पाऊस झाला.
वसमत तालुक्यातील आंबा मंडळात १८.३ मिमी, औंढा नागनाथ तालुक्यात औंढा नागनाथ मंडळात ८० मिमी, येळेगाव मध्ये ४९.८, साळणामध्ये २३.५ मिमी, जवळा बाजार मंडळात २२.८ मिमी पाऊस झाला.सेनगाव तालुरक्यातील मंडळात मध्यम पाऊस झाला.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.