सोलापूर : जिल्ह्यात गेल्या दोन दिवसांपासून विश्रांती घेतलेल्या पावसाने पुन्हा एकदा सुरुवात केली आहे. गुरुवारी (ता.१७) पहाटे पावसाने जोरदार हजेरी लावली. जिल्ह्यातील अनेक भागात सर्वदूर हा पाऊस झाला. प्रामुख्याने सांगोला, पंढरपूर, बार्शी, उत्तर सोलापूर, मोहोळ भागात पावसाचा सर्वाधिक जोर राहिला. माळशिरस तालुक्यात शिंगोर्णी ओढ्याच्या पाण्यात एकजण वाहून गेला.
यंदा हंगामाच्या सुरवातीपासून पावसाने चांगली सुरुवात केली आहे. जून आणि जुलैने पावसाची सरासरी ओलांडली आहे. ऑगस्टमध्ये पावसाने काहिशी विश्रांती घेतली. पण, सप्टेंबरमध्ये मात्र त्याने पुन्हा सुरुवात केली. गेल्या दोन-तीन दिवसांपासून पाऊस होतो आहे. बुधवारी त्याचा जोर अधिक राहिला.
दुपारपासून सुरु झालेला पाऊस रात्री उशिरापर्यंत थांबून-थांबून सुरुच होता. गुरुवारी मध्यरात्री साडेबाराच्या सुमारास त्याचा जोर वाढला. सुमारे अर्धा - पाऊणतास पाऊस पडल्यानंतर तो थांबला. त्यानंतर पहाटे पुन्हा त्याने जोर लावला.
या पावसामुळे सांगोल्यातील महूद येथील कासाळ ओढा भरुन वाहू लागला. पंढरपुरातील खर्डी येथेही अनेक भागात ताली भरल्या. जवळच्या नाल्यातही बरेच पाणी साठले. उत्तर सोलापूर, मोहोळ भागात बहुतांश छोटे-मोठे पाझर तलाव निम्मे, तर काही भरले. दुपारी बारा वाजेपर्यंत पावसाची रिपरिप थांबून-थांबून सुरुच होती.
बुधवारी (ता.१६) माळशिरसमधील शिंगोर्णी ओढ्यातील पाण्यामध्ये बाळासाहेब खरे (वय-४५ रा. पिलीव) हे मेडिकल दुकानदार वाहून गेले. ते त्यांच्या कारमधून आटपाडीहून पिलीवकडे निघाले होते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.