पुणे जिल्ह्यात काही ठिकाणी मुसळधार

पुणे : जिल्ह्यात पावसाच्या कमी अधिक स्वरूपात पाऊस सुरूच आहे. काही ठिकाणी सरी ढगफुटीसारख्या पडत आहेत. त्यामुळे कमी वेळात अधिक पाऊस होत आहे. परिणामी, शेतकऱ्यांच्या पिकांचे मोठे नुकसान होत आहे. त्यामुळे शेतकऱ्यांपुढे समस्यांचा डोंगर उभा असल्याची स्थिती आहे. 

गेल्या काही दिवसांपासून जिल्ह्यात ढगाळ हवामान आहे. सकाळपासून कडाक्याचे ऊन पडत आहे. तरी, दुपारनंतर काही ठिकाणी अचानक ढग भरून येत आहेत. त्यामुळे जोरदार पाऊस पडत आहे. कमी वेळात धो-धो पाऊस पडत असल्याने नागरिकांची चांगलीच धावपळ होत आहे. मुसळधार पाऊस पडल्याने ओढे, नाल्यांना पूरस्थिती तयार होत आहे.

वाहतूक बंद सारखे प्रकार होत आहे. काही ठिकाणी शेतातील पिकांसह माती वाहून जात असल्याची स्थिती आहे. मागील आठवड्यापासून जिल्ह्यात ठिकठिकाणी पाऊस पडत आहे. त्यामुळे नुकसानीच्या क्षेत्रामध्ये वाढ होत आहे. 

हवेली तालुक्यातील पुणे शहर १६.८, केशवनगर १६.८, खडकवासला २२.८, चिंचवड १०.३, तर कळसमध्ये ११.८ मिलिमीटर पाऊस पडला. थेऊर, खेड,भोसरी, हडपसर, वाघोली, कोथरूड येथे हलक्या सरी पडल्या. भोरमधील नसरापूर १६.३ मिलिमीटर पाऊस पडला. तर, किकवी, संगमनेर, निगुडघर येथेही पावसाचा शिडकावा झाला. मावळमधील तळेगाव २२.३ मिलिमीटर पावसाची नोंद झाली. खेडमधील पाईट २१.३, आळंदी २२.३ मिलिमीटर पाऊस पडला असून चाकण राजगुरुनगर, कुडे,  कन्हेरसर, कडुस हलका पाऊस पडला. 

बारातमती, इंदापुरात पुन्हा जोरदार

बारामतीतील सुपा १०.०, उंडवडी ११.५ मिलिमीटर तर मोरगाव, माळेगाव, पणदरे, लोणी, इंदापूरमधील भिगवण, इंदापूर, लोणी, काटी, निमगाव, अंथुर्णी, सणसर. दौंडमधील पाटस, यवत, कडेगाव, राहू, वरवंड, रावणगाव, दौंड, पुरंदरमधील सासवड, भिवंडी, कुंभारवळण, जेजुरी, परिंचे, राजेवाडी येथेही पावसाच्या चांगल्याच सरी बरसल्या.