सोलापुरात मॉन्सूनोत्तर पावसाचा जोर

सोलापूर : गेल्या वर्षी वजा पातळीत असलेले जिल्ह्यातील मध्यम प्रकल्प ऑक्‍टोबर महिन्यातील पावसाने ‘प्लस’मध्ये आले आहेत. मांगी (ता. करमाळा) हा प्रकल्प त्याला अपवाद ठरला आहे. बोरी (ता. अक्कलकोट) व पिंपळगाव-ढाळे (ता. बार्शी) हे प्रकल्प १०० टक्के भरले आहेत. त्यामुळे या प्रकल्पाच्या कार्यक्षेत्रातील शेतकऱ्यांना दिलासा मिळाला आहे.

जिल्ह्यात मागील वर्षी सरासरी केवळ ३८ टक्के पाऊस पडला होता. यंदाही सप्टेंबरअखेर पावसाची सरासरी समाधानकारक नव्हती. मात्र, ऑक्‍टोबर महिन्यात झालेल्या मॉन्सूनोत्तर पावसाने जिल्ह्यात पावसाची सरासरी वाढली आहे. ऑक्‍टोबर महिन्यात झालेल्या पावसाचा फायदा जिल्ह्यातील मध्यम प्रकल्प भरण्यासाठी झाला आहे. 

लाभक्षेत्र विकास प्राधिकरणकडे असलेल्या सात मध्यम प्रकल्पांपैकी केवळ मांगी प्रकल्पात अद्याप वजा ०.६३ टक्के इतका उपयुक्त पाणीसाठा आहे. त्याचा अपवाद वगळता अन्य प्रकल्पांत बऱ्यापैकी पाणीसाठा निर्माण झाला आहे. अक्कलकोट व बार्शी तालुक्‍यात झालेल्या दमदार पावसामुळे बोरी व पिंपळगाव-ढाळे हे दोन्ही मध्यम प्रकल्प १०० टक्के भरले आहेत. पिंपळगाव-ढाळे हा प्रकल्प तर एकाच दिवसात भरला. 

सोलापूर शहराच्या जवळ असलेल्या एकरूख मध्यम प्रकल्पात शिरापूर उपसा सिंचन योजनेच्या माध्यमातून उजनी धरणाचे पाणी सोडण्यात आले होते. त्याचबरोबर कारंबा शाखा कालव्यातूनही या प्रकल्पात पाणी सोडल्याने त्याच्या उपयुक्त पाणीसाठ्यात मोठी वाढ झाली आहे. पहिल्यांदाच उजनीचे पाणी या प्रकल्पात वेगवेगळ्या दोन माध्यमांतून सोडण्यात आले. त्यामुळे या प्रकल्पाच्या पाणीसाठ्यात वाढ होण्यास मदत झाली. 

प्रकल्पनिहाय उपयुक्त पाण्याची टक्केवारी