वाईत हळदीला उच्चांकी भाव

सातारा : शेतकऱ्यांचे सोने म्हणून ओळखल्या जाणाऱ्या हळदीचे दर तेजीत आहेत. बाजारपेठेत वाढलेल्या मागणीमुळे अनेक वर्षांनंतर हळदीला चांगला दर मिळू लागला आहे. वाई येथील कृषी उत्पन्न बाजार समितीच्या मुख्य आवारात हळद लिलावात मंगळवारी बावधन (ता. वाई) येथील शेतकरी गणेश विश्‍वास कदम यांच्या साडेपाच क्विंटल सेलम जातीच्या हळदीला २९ हजार रुपये उच्चांकी प्रतिक्विंटल दर मिळाला. तसेच सरासरी दर नऊ ते १३ हजार इतका निघाला आहे.

या संकटांचा सामना करून शेतकरी हे पीक घेत असतात. मात्र शेतकऱ्यांच्या हातात बाजारपेठेतील दर नसल्याने अनेकदा बाजारपेठेत आवक वाढली, की दर गडगडतात. त्यामुळे अनेकदा शेतकऱ्यांचा खर्चही निघत नाही. तशीच काहीशी स्थिती हळदीची मागील तीन ते चार वर्षांत झाली. त्यामुळे हळदीचे दर कमी राहिले. त्यामुळे शेतकऱ्यांना अपेक्षित पैसे मिळाले नाहीत. मात्र गेल्या वर्षापासून हळदीला चांगलीच मागणी वाढलेली आहे. त्याचबरोबर मागील वर्षापासून सुरू असलेल्या कोरोनामुळेही हळदीचा दैनंदिन वापर वाढला आहे.

वाई कृषी उत्पन्न बाजार समितीत गेल्या १२ फेब्रुवारीपासून हळदीचे लिलाव सुरू झाले आहे. हळदीस मागणी वाढल्याने दर तेजीत येण्यास सुरुवात झाली आहे. बावधन येथील गणेश विश्‍वास कदम यांच्या सेलम जातीच्या हळदीस क्विंटलला २९ हजार रुपये दर निघाला. तर भुईंज येथील शेतकरी संदीप ज्ञानेश्‍वर भोसले यांच्या हळदीला २५ हजार रुपये इतका उच्चांकी दर मिळाला.

मागील सहा ते सात वर्षांपासून हळदीस दर नसल्यामुळे हळद करणे परवडत नव्हते. यंदा हंगामात मात्र हळदीस दर समाधानकारक मिळत आहे. मी पिकविलेल्या हळदीस मंगळवारी उच्चांकी २९ हजार दर मिळाला. - गणेश कदम, हळद उत्पादक शेतकरी

शेतकऱ्यांनी चांगल्या दर मिळण्यासाठी तसेच फसवणूक टाळण्यासाठी शेतकऱ्यांनी आपली हळद ही वाई कृषी उत्पन्न बाजार समितीमध्ये विक्रीसाठी आणावी. - लक्ष्मणराव पिसाळ, सभापती वाई कृषी उत्पन्न बाजार समिती.