पुणे : देशी गोवंश सुधारणा कार्यक्रमांतर्गत जिल्ह्यातील ८९ गावांची निवड पशुसंवर्धन विभागाकडून करण्यात आली आहे. या गावांमध्ये देशी व संकरित गाई तसेच म्हैशींसाठी उच्च दर्जाच्या रेत मात्रा वापरण्यात येणार आहे. यामुळे दुधाळ जातिवंत कालवडी शेतकऱ्यांच्या गोठ्यात तयार होणार असून, दूध उत्पादनातही वाढ करणे शक्य होणार आहे, अशी माहिती जिल्हा परिषदेचे पशुसंवर्धन अधिकारी डॉ. शिवाजी विधाटे यांनी दिले.
शेतीपूरक उद्योग म्हणून जिल्ह्यात दुग्ध व्यवसाय केला जातो. अलीकडे देशी गायींचे संगोपन वाढत आहे. मात्र दूध उत्पादन कमी असल्याने दुधाचे प्रमाण वाढण्यासाठी आणि देशी गाईंचे जतन करण्यासाठी केंद्र शासनाच्या योजनेंतर्गत जिल्ह्यात गोवंश सुधारणा कार्यक्रम हाती घेण्यात आला आहे. जिल्ह्यातील निवड केलेल्या गावांमध्ये देशी आणि संकरित गाई तसेच म्हैशींसाठी उच्च दर्जाच्या रेतमात्रा वापरण्यात येणार आहेत. त्यानंतर त्यांचे ऑनलाइन रेकॉर्ड ठेवले जाणार आहे.
देशी गाईंची सुधारणा करण्यासाठी गीर, सहिवाल, खिल्लार तसेच संकरित गाईंसाठी एचएफ आणि म्हशीसाठी मुऱ्हा जातीच्या रेतमात्रा उपलब्ध करून देण्यात येणार आहेत.
कृत्रिम रेतन केल्यानंतर इनाफ या संगणक प्रणालीमध्ये ही माहिती नोंदवली जाणार आहे. जिल्ह्यामध्ये प्रत्येक गावांमध्ये जनावरांची निवड करून त्यांना कृत्रिम रेतन करण्यात येणार आहे. १५ सप्टेंबर पासून यासंदर्भात जिल्ह्यात कामकाजास सुरुवात झाली. मार्च महिन्यापर्यंत एका गावामध्ये किमान १०० कृत्रिम रेतन करण्याचे उद्दिष्ट ठेवण्यात आले आहे, असे डॉ. विधाटे यांनी सांगितले.
देशी गोवंश सुधारणा कार्यक्रमात निवडलेल्या गावांची तालुकानिहाय संख्या : आंबेगाव १, बारामती ३, भोर ६, हवेली २, जुन्नर ७, मावळ २, शिरूर १६, पुरंदर २, मुळशी ६ खेड ४, दौंड १०, इंदापूर ३०.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.