कोल्हापुरात वाढीव वीज बिलांची होळी

कोल्हापूर : वाढीव वीज बिलांविरोधात येथील जिल्हाधिकारी कार्यालयासह प्रांत, तहसील व महावितरण कार्यालयासमोर सोमवारी (ता. १३) वीज बिलांची होळी करण्यात आली.

राज्य इरिगेशन फेडरेशन व राज्य वीजग्राहक संघटना, स्वाभिमानी शेतकरी संघटनेसह अन्य संघटना या आंदोलनात सहभागी झाल्या. लॉकडाउन काळातील तीन महिन्यांची ३०० युनिटपर्यंतची घरगुती वीज बिले शासनाने भरावीत, अशी मागणी यावेळी करण्यात आली. कोल्हापूर जिल्हाधिकारी कार्यालयासमोर प्रा. डॉ. एन. डी. पाटील यांच्या प्रमुख उपस्थितीत हे आंदोलन झाले. जिल्हाधिकारी दौलत देसाई यांना मागण्यांचे निवेदन दिले. यावेळी वीज तज्ज्ञ प्रताप होगाडे, माजी खासदार राजू शेट्टी, बाबासाहेब पाटील भुयेकर, विक्रांत पाटील किणीकर, आर. के. पवार, बाबा पार्टे, बाबासाहेब देवकर, राजेंद्र सूर्यवंशी, समीर पाटील व सचिव मारुती पाटील उपस्थित होते.

श्री. होगाडे म्हणाले, की कोरोनाच्या संचारबंदीत महावितरणला ग्राहकांचे मीटर रीडिंग घेता आलेले नाही. ही वस्तुस्थिती असली तरी जूनमध्ये संचारबंदीत सूट मिळताच महावितरणने मार्च ते मे असे एकत्रित मीटर रिडिंग घेऊन त्याप्रमाणे ग्राहकांना बिले दिली आहेत. एप्रिलपासून वीज दरामध्ये वाढ केली आहे. तीन महिन्यांच्या आलेल्या वाढीव वीज बिलामुळे ग्राहक त्रस्त आहेत. कोरोनाच्या महामार्गामुळे रोजीरोटीचा प्रश्न निर्माण झाला असल्याने वाढीव बिले डोकेदुखी ठरत आहेत. एप्रिलमध्ये झालेली दरवाढ आम्हाला मान्य नाही. त्यासंदर्भात शासन प्रतिनिधींशी चर्चा करून दरवाढ मागे घ्यावी, अशी भूमिका आम्ही घेणार आहोत. सध्या वाढीव बिलाचा प्रश्न मार्गी लावणार आहोत. शासनाने दखल न घेतल्यास आंदोलन अधिक तीव्र केले जाणार आहे.