‘पोकरा’मधून फळबाग, वनशेती, बांबू, तुती लागवडीस प्रोत्साहन 

नानाजी देशमुख कृषी संजीवनी प्रकल्पांतर्गत (पोकरा) फळबाग, वनशेती, बांबू व तुती लागवडीस प्रोत्साहन दिले जात आहे.
POCRA
POCRA

औरंगाबाद: नानाजी देशमुख कृषी संजीवनी प्रकल्पांतर्गत (पोकरा) फळबाग, वनशेती, बांबू व तुती लागवडीस प्रोत्साहन दिले जात आहे. हवामान बदलामुळे उद्भवलेल्या परिस्थितीशी जुळवून घेण्यास शेतकऱ्यांना सक्षम करण्याच्या उद्देशाने राबविण्यात येत असलेल्या प्रकल्पामध्ये वातावरणातील कर्ब वायूचे स्थिरीकरण करण्यासाठीचा हा प्रयत्न असल्याचे सांगण्यात येते. 

राज्य शासनामार्फत जागतिक बँकेच्या अर्थसहाय्याने विदर्भ, मराठवाडा, तसेच उत्तर महाराष्ट्रातील जळगाव अशा एकूण १५ जिल्ह्यांमध्ये ‘पोकरा’ प्रकल्प राबविला जात आहे. गावशिवारात वृक्षांची व फळबागांची लागवड त्यासाठी अतिशय प्रभावी ठरते. यामुळे शेतकऱ्यांच्या पारंपरिक पीक पद्धतीमध्ये बदल होऊन, शेतकऱ्यांच्या आर्थिक उन्नती बरोबरच हवामान बदलास कारणीभूत ठरणाऱ्या कर्ब वायूंचे स्थिरीकरण करण्यास मदत होते. अवेळी पाऊस व दुष्काळी परिस्थितीवर मात करून शेतकऱ्यांना शाश्वत उत्पन्नाचा स्रोत निर्माण यामुळे करता येणे शक्य आहे. 

ग्राम कृषी संजीवनी समितीने मान्यता दिलेले अत्यल्प, अल्प भूधारक तसेच ५ हेक्टर पर्यंत जमीनधारणा असलेले शेतकरी यासाठी पात्र असतील. वनशेतीसाठी वृक्ष लागवड व बांबू लागवड ही सार्वजनिक क्षेत्रावर (ग्रामपंचायत व इतर शासकीय क्षेत्रावर) ग्राम कृषी संजीवनी समितीने मान्यता दिलेल्या क्षेत्रावर लागवड करता येईल.  असे आहे अर्थसहाय्य  या प्रकल्पांतर्गत वैयक्तिक शेतकऱ्यांच्या शेतावर वनशेती, वृक्ष लागवड , बांबू लागवड, फळबाग लागवड तसेच रेशीम उद्योगासाठी तुती लागवड करण्यासाठी वैयक्तिक शेतकऱ्यांना आर्थिक साहाय्य देण्यात येते. तसेच गावातील सार्वजनिक जमिनीवर वनशेती, वृक्ष लागवड व बांबू लागवड करण्यासाठी देखील १०० टक्के अर्थसाहाय्य देण्यात येते.  याची करता येईल लागवड  वनशेती पद्धतीमध्ये साग, ऐन, शिसम, मोह, जांभूळ, खैर, शिवन, बेहेडा, धावडा इ. स्थानिक परिस्थितीत अनुकूल असणाऱ्या प्रजाती. बांबू लागवड हा स्वतंत्र घटक आहे. तर आंबा, डाळिंब, पेरु, सीताफळ, आवळा, कागदी लिंबू, संत्रा व मोसंबी आदी फळझाडांची लागवड करता येणार आहे.  वैयक्तिक लाभ योजनेंतर्गत अत्यल्प, अल्प भूधारक शेतकऱ्यांना ७५ टक्के व २ ते ५ हेक्टर जमीनधारकांना ६५ टक्के. तर वृक्ष लागवड व बांबू लागवड ही सार्वजनिक क्षेत्रावर (ग्रामपंचायत व इतर शासकीय क्षेत्रावर) लागवडीकरिता १०० टक्के अनुदान देण्यात येणार आहे. तुती रोपे तयार करणे व तुती लागवड -रेशीम उद्योग या घटकासाठी दिलेल्या मापदंडानुसार सामान्य प्रवर्गातील लाभार्थींना ७५ टक्के व अनुसूचित जाती/अनुसूचित जमाती करिता ९० टक्के अर्थसहाय्य देण्यात येणार आहे.  प्रतिक्रिया प्रकल्पांतर्गत समाविष्ट गावातील इच्छुक शेतकऱ्यांनी https://mahapocra.gov.in या संकेतस्थळास भेट द्यावी. तसेच अर्ज करण्यासाठी, गाव समूहातील इच्छुक शेतकऱ्यांनी प्रकल्पाच्या https://dbt.mahapocra.gov.in या संकेतस्थळावर ऑनलाइन नोंदणी करून घटक निहाय अर्ज व आवश्यक कागदपत्रे अपलोड करावीत किंवा गावाच्या समूह साहाय्यक अथवा कृषी साहाय्यकाशी संपर्क साधावा.  - विकासचंद्र रस्तोगी, प्रकल्प संचालक, पोकरा 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com