गडचिरोली जिल्ह्यात अतिवृष्टीमुळे १७९७ घरांची पडझड

संग्रहित छायाचित्र
संग्रहित छायाचित्र

गडचिरोली  ः या वर्षी अतिवृष्टीमुळे जिल्ह्यातील १७९७ घरांची पडझड झाल्याची माहिती जिल्हा प्रशासनाच्या सूत्रांनी दिली. या संदर्भातील माहिती संकलनाचे काम अद्यापही सुरूच असल्याने पडझड झालेल्या घरांच्या संख्येत वाढ होण्याची शक्यता प्रशासनाने वर्तवली आहे. 

गडचिरोली जिल्ह्यात २४ जुलैपासून पावसाला सुरुवात झाली. जुलैअखेरपर्यंत पाऊस कोसळत होता. या दरम्यान अनेक तालुक्‍यांत वारंवार अतिवृष्टी होऊन पूरस्थिती निर्माण झाली. ग्रामीण भागातील मातीच्या कच्च्या घरांना अतिवृष्टीचा सर्वाधिक फटका बसला. जिल्हाधिकारी कार्यालयाकडे उपलब्ध असलेल्या आकडेवारीनुसार, २० पक्‍की व कच्ची घरे पूर्णतः कोसळली आहेत. यामध्ये गडचिरोली तालुक्‍यातील १५, आरमोरी तालुक्‍यातील चार, तर सिरोंचा तालुक्‍यातील एका घराचा समावेश आहे. २२ पक्‍क्‍या घरांची अंशतः पडझड झाली आहे. यामध्ये सर्वाधिक १५ घरे सिरोंचा तालुक्‍यातील आहेत. अंशतः पडझड झालेल्या कच्च्या घरांची संख्या सर्वाधिक आहे. सुमारे १ हजार ५३६ कच्ची घरे आहेत.

११६ जनावरांच्या गोठ्यांची पडझड झाली आहे. पुरात २४ मोठी दुधाळ जनावरे, सात लहान तर ओढ काम करणारी ३६ मोठी जनावरे वाहून गेली आहेत. राज्य शासनाच्या महसूल विभागाने पूरग्रस्तांच्या मदतीसाठी एक कोटी रुपये उपलब्ध करून दिले आहेत. सदर रक्‍कम तहसीलदारांकडे पाठविण्यात आली आहे. नुकसानग्रस्त भागात पंचनाम्याचे काम सुरू आहे. ज्या भागात पंचनामे झाले त्यांना आर्थिक मदतसुद्धा दिली जात आहे.

जिल्ह्यातील अनेक नदी, नाल्यांना अतिवृष्टीमुळे पूर आला. त्यासोबतच अतिवृष्टीमुळे आतापर्यंत विविध घटनांमध्ये जिल्ह्यातील आठ नागरिक मृत्युमुखी पडले आहेत. यामध्ये गडचिरोली, चामोर्शी, मुलचेरा व भामरागड तालुक्यांतील प्रत्येकी एक, तर अहेरी, आरमोरी तालुक्‍यांतील प्रत्येकी दोघांचा समावेश आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com