तासगाव तालुक्‍यात चाऱ्याची शोधाशोध

तासगाव, जि. सांगली : तासगाव तालुक्‍यात मे महिन्यात पुरेल एवढा चारा शिल्लक आहे, असा जावईशोध कृषी विभागाने लावला आहे. साहजिकच त्यामुळे तालुक्‍यात चारा छावणी सुरू होण्याची शक्‍यता मावळल्यात जमा आहे. गवोगावी शेतकरी, पशुपालकांकडून चाऱ्याची शोधाशोध सुरू आहे. तालुक्याच्या पूर्व भागात पाणी, चाऱ्याचे दुर्भिक्ष आहे. 

तासगाव तालुका या वर्षी पुन्हा भीषण दुष्काळात होरपळत आहे. सुदैवाने म्हैसाळ, ताकारी, टेंभू, विसापूर-पुणदी, आरफळ या योजनांतून पाणी सोडल्याने थोडा दिलासा मिळाला. परंतु पूर्व भागात पाणी, चाऱ्याचे दुर्भिक्ष आहे. त्यात कृषी विभागाने मंडल निहाय मे महिनाअखेर पुरेल इतका चारा उपलब्ध असल्याचा अहवाल दिला आहे. त्यामुळे चारा छावणी सुरू करण्याच्या प्रस्तावाची गोची झाली आहे. 

तासगाव कृषी उत्पन्न बाजार समितीने पशुधन वाचवण्यासाठी चारा छावण्या सुरू करण्याची तयारी दर्शवली आहे. डोंगरसोनी येथे बाजार समितीतर्फे चारा छावणी सुरू करण्याच्या हालचाली सुरू आहेत. डोंगरसोनी ग्रामपंचायतीने ग्रामसभेचा ठराव करून चारा छावणी मागणी केली आहे.

महसूल प्रशासनाने बैठकही बोलावली होती. डोंगरसोनी या एकाच गावातून ग्रामपंचायतीकडून मागणी आली. सर्वपक्षीय मोर्चाच्या वतीने देण्यात आलेल्या निवेदनात तालुक्‍यात १० गावांत चारा छावण्या सुरू करण्याची मागणी आहे.