लोकांनी साथ दिल्यास देशाचे राजकारण बदलेल - शरद पवार

सोलापूर : ‘देशात सध्या मूठभर लोकांसाठीच काम सुरू आहे. बड्या उद्योजक, श्रीमंतांना झुकते माप दिले जात आहे. सामान्य माणूस, शेतकऱ्यांकडे ज्या अपेक्षेप्रमाणे लक्ष द्यायला हवे, ते दिले जात नाही. लोकांनी साथ दिल्यास देशात व राज्यात सुरू असलेले राजकारणाचे चित्र नक्कीच बदलेल,’ असे राष्ट्रवादी कॉंग्रेसचे अध्यक्ष तथा खासदार शरद पवार यांनी मंगळवारी (ता. १२) कुर्डुवाडीत सांगितले.

कुर्डुवाडीतील के. एन. भिसे महाविद्यालयामध्ये माढा तालुका शिक्षण प्रसारक मंडळाचे अध्यक्ष तथा माजी आमदार विनायकराव पाटील यांचा अमृतमहोत्सव सोहळा, संस्थापक अध्यक्ष (कै.) के. एन. भिसे यांच्या पुतळ्याचे अनावरण, महाविद्यालयाच्या ७५ वर्गखोल्यांचे उद्‌घाटन आणि श्री. पवार यांनी तालुक्‍याच्या विकासासाठी दिलेल्या योगदानाबद्दल त्यांचे ऋणनिर्देश यानिमित्त आयोजित केलेल्या कार्यक्रमात ते बोलत होते. शेतकरी कामगार पक्षाचे ज्येष्ठ नेते आमदार गणपतराव देशमुख अध्यक्षस्थानी होते.

श्री. पवार म्हणाले, ‘‘केंद्र सरकारने जनतेला दिलेली आश्‍वासने पाळली नाहीत. शेतमालाला उत्पादनखर्च अधिक ५० टक्के इतका दर देण्याचे आश्‍वासन दिले; परंतु तेही पाळले नाही. शेतमालाला भाव मिळण्यासाठी कष्टाचे माप पदरात पाडण्यासाठी आपण सामूहिकपणे एकत्र राहणे गरजेचे आहे. वर्षभराने आपल्याला पुन्हा लोकांसमोर जावयाचे आहे. तेव्हा आपण जागरूक राहिलो, तर देशाचे व राज्याचे राजकारण बदलल्याशिवाय मी स्वस्थ बसणार नाही व ते राजकारण सामान्यांच्या हिताची जपणूक करणारे असेल.''’ श्री. पाटील हे मृदृभाषी, कमी व योग्य ते बोलणारे आहेत. समाजकारणामध्ये व लोकप्रतिनिधीएवढी मोठ्या संधीनंतर त्यांनी जनमानसातील भूमिका आदर्शवत ठेवली आहे. के. एन. भिसे यांनी नगराध्यक्ष म्हणून, तसेच विविध संस्थेत व कुर्डुवाडीकरांसाठी चांगले काम केले, असे गौरवोद्गारही त्यांनी काढले.

`गुरुजी'पासून लांब राहा' या प्रसंगी बोलताना श्री. पवार म्हणाले, की चांगल्या विचारांचा पाठिंबा देऊन समाजाला मार्गदर्शन करणाऱ्या महाराजांची संख्या कमी होऊ लागली आहे. मध्यंतरी एक गुरुजी म्हणाले, ‘‘माझ्या शेतातील आंबे खाल्ल्याने मूल होते. ही गमतीशीर गोष्ट आहे, अशा लोकांपासून बाजूला राहायला पाहिजे.’’