कापूस, मका हमीभावाकडे दुर्लक्षः रघुनाथदादा पाटील 

जळगाव ः कापूस, मका हे राज्यात महत्त्वाचे पीक आहे. परंतु या शेतीमालास सध्या हमीभाव मिळत नसल्याची स्थिती आहे. प्रशासन, राजकीय पक्ष, शेतकऱ्यांशी निगडित संघटना यावर बोलत नाहीत, हे आणखी दुर्दैव आहे, असा दावा महाराष्ट्र राज्य शेतकरी संघटनेचे अध्यक्ष रघुनाथदादा पाटील यांनी येथे पत्रकारांशी बोलताना केला. 

रघुनाथदादा हे संघटना बांधणीसह शेतकरी प्रश्‍नांचा आढावा घेण्यासाठी खानदेशच्या दौऱ्यावर आहेत. शुक्रवारी (ता.२३) धुळे जिल्ह्यातील कार्यकर्ते, शेतकरी प्रश्‍नांचे जाणकार यांच्याशी चर्चा केली. तेथे दोन तालुक्यांचे अध्यक्ष नेमले. शनिवारी (ता.२४) जळगाव जिल्ह्यातील कार्यकर्ते, पदाधिकारी यांच्याशी पद्मालय विश्रामगृहात संवाद साधला. संघटनात्मक बाबी, पुढील कामाची दिशा याबाबत चर्चा केली. यानिमित्त पत्रकारांशी वार्तालाप केला. 

रघुनाथदादा म्हणाले, की कापूस, मक्याला हमीभाव नाही. शासकीय कापूस खरेदी सुरू करण्याच्या हालचाली कुठेही नाहीत. शेतकऱ्यांचे मोठे नुकसान होत आहे. या प्रश्‍नी ठिकठिकाणी लवकरच मका, कापूस परिषद घेणार आहे. त्यात या समस्यांकडे राज्यकर्त्यांचे लक्ष वेधू. राज्यात जे विरोधी पक्ष व राजकीय पक्ष आहेत, ते हमीभावाच्या प्रश्‍नाबाबत बोलत नाहीत. शेतकरी नेते म्हणविणारे राजू शेट्टी हे सत्तेतील मंडळीशी सलगी करून आहे. सदाभाऊ खोत हे भाजपचे काम करतात. अशात शेतकरीप्रश्‍न मार्गी लावण्यासाठी आक्रमकपणे काम करण्याची गरज आहे. आम्ही त्या त्या भागातील जिल्हा उपनिबंधक, सहायक निबंधक यांच्याकडे हमीभाव का मिळत नाही, यासंबंधीचे मुद्दे मांडू. ज्या बाजार समित्या हमीभावप्रश्‍नी काम करीत नाहीत, त्या बरखास्त करण्याची मागणी करू, असेही रघुनाथदादा म्हणाले.