नुकसानग्रस्त पिकांचे तातडीने पंचनामे करा : भरणे

सोलापूर ः अतिवृष्टीमुळे नुकसान झालेल्या पिकांचे तातडीने पंचनामे करुन अहवाल सादर करावेत, अशा सूचना पालकत्री दत्तात्रय भरणे यांनी गुरुवारी (ता.२४) दिल्या.

जिल्ह्यातील पंढरपूर तालुक्यातील गार्डी, कासेगांव, सांगोला तालुक्यातील महूद येथील कासाळ-गंगा ओढा तसेच माळशिरस तालुक्यातील मळोली येथील अतिवृष्टिने पूर आला. त्यामुळे नुकसानग्रस्त पिकांची व पडझड झालेल्या घरांची पहाणी पालकमंत्री भरणे यांनी केली. यावेळी, आमदार भारत भालके, माजी जिल्हा परिषद अध्यक्षा जयमाला गायकवाड, जिल्हाधिकारी मिलींद शंभरकर, प्रांताधिकारी सचिन ढोले, उदयसिंह भोसले, शमा पवार, तहसिलदार वैशाली वाघमारे, योगेश खरमाटे, गटविकास अधिकारी रविकिरण घोडके, संतोष राऊत, स्मिता पाटील, तालुका कृषि अधिकारी गजानन ननवरे, दिपाली जाधव, राजेंद्र पवार, कार्यकारी अभियंता दत्तात्रय गावडे, महावितरणचे कासार उपस्थित होते.

भरणे म्हणाले, ‘‘अतिवृष्टीने शेतकऱ्यांच्या हाती आलेल्या पिकांचे मोठ्या प्रमाणात नुकसान झाल्याने शेतकरी अडचणीत आला आहे. 

अशा परिस्थितीत शासन शेतकऱ्यांच्या पाठीशी खंबीरपणे उभे असून, शासन स्तरावरुन आवश्यक ती मदत करण्यात येणार आहे. तसेच शेतकऱ्यांनी कोणतीही काळजी करु नये. वेळेत ही मदत देण्याबाबत प्रयत्न राहतील. यावेळी आमदार भालके यांनी नुकसानगस्त शेतकऱ्यांना व नागरिकांना शासनाच्या वतीने तात्काळ नुकसान भरपाई देण्यात यावी, अशी मागणी केली.

५४ गावातील सात हजार हेक्टर पिकांचे नुकसान

पंढरपूर, माळशिरस व सांगोला तालुक्यातील ५४ गावांतील मोठ्या प्रमाणात पिकांचे नुकसान झाले आहे. यामध्ये सुमारे ६५०० ते ७००० हेक्टर पिकांचे नुकसान झाले आहे. नुकसानग्रस्त ५१७ कुटुबांचे स्थलांतर करण्यात आले आहे. तसेच बंधाऱ्यांचे व पाझर तलावांचेही मोठ्या प्रमाणात नुकसान झाले असून, पुराच्या पाण्यामुळे काही गावातील विद्युत पुरवठा खंडीत झाला आहे. त्यामुळे विद्युत पुरवठा पुर्वरत करण्याच्या सूचना संबधित अधिकाऱ्यांना दिल्या आहेत, असे पालकमंत्री भरणे म्हणाले.