संक्रांतीला कृषी संस्कृतीचे महत्त्व शहरी भागातही टिकून

नाशिक : नवीन वर्षाच्या सुरुवातीला संक्रांतीचा सण येतो. पतंग उडवून, तिळगूळ वाटून स्नेहीजनांसोबत हा सण मोठ्या आनंदाने साजरा होतो. भोगी, मकर संक्रांत व कर अशा तीन दिवस साजरा होणाऱ्या सणाला कृषी संस्कृतीचा मोठा संदर्भ आहे. शहरी भागातही या सणानिमित्त कृषी संस्कृतीचे महत्त्व आजही टिकून आहे.  

मातीच्या बोळक्यांमध्ये भुईमूग शेंगा, गाजर, गव्हाची ओंबी, हरभऱ्याचे घाटे, उसाच्या कांड्या भरून ‘सुगडपूजा’ केली जाते. यासाठी या पिकांना मोठी मागणी असते. यंदा अतिवृष्टीमुळे शेतीमालाचे झालेले नुकसान व पुढे गेलेल्या रब्बी हंगामामुळे अत्यल्प प्रमाणात हा शेतीमाल विक्रीसाठी उपलब्ध झाल्याचे पाहायला मिळाले. तर भोगीसाठी लागणाऱ्या गाजर, वांगी, तीळ, वालपापडी या भाज्यांची मागणी मोठ्या प्रमाणावर दिसून आली. त्यात आवक कमी व मागणी जास्त असल्याने काही शेतीमालाच्या दरात दुपटीने वाढ झाली. त्यामुळे किरकोळ बाजारात सुगडासाठी लागणाऱ्या मालाची विक्री वाटा पद्धतीने होताना दिसून आली. 

नाशिक बाजार समितीमध्ये घाऊक बाजारात सोमवारी (ता. १३) वांग्याची कमी झाल्याने प्रतिकिलो दर दुप्पट होऊन ३० रुपयांपर्यंत होते. तर किरकोळ बाजारात वांग्याची विक्री ५० रुपयांपर्यंत विक्री झाली.

गाजराची आवक मंदावल्याने दरात ५ रुपयांपर्यंत वाढ झाली त्याचे दर ३० रुपये होते, तर किरकोळ बाजारात ६० रुपयांपर्यंत गाजराची विक्री झाली. वालपापडीची आवक दुपटीने वाढल्याने प्रतिकिलो दर ७ रुपयांनी कमी होऊन १३ रुपयांपर्यंत आले, मात्र त्याची किरकोळ बाजारात विक्रीही दुपटीने ३० रुपये प्रतिकिलोपर्यंत झाली. 

असा राहिला शेतीमालाचा दर (प्रतिकिलो)