सोलापुरात हिरवी मिरची, वांगी, दोडक्याच्या दरांत सुधारणा

सोलापूर ः सोलापूर कृषी उत्पन्न बाजार समितीच्या आवारात गत सप्ताहात हिरवी मिरची, वांगी, दोडक्याला चांगला उठाव मिळाला. त्यामुळे त्यांच्या दरात संपूर्ण सप्ताहभर सुधारणा राहिल्याचे बाजार समितीच्या सूत्रांकडून सांगण्यात आले.  

बाजार समितीच्या आवारात गत सप्ताहात रोज हिरव्या मिरचीची ४० ते ५० क्विंटल, वांग्यांची २० ते ३० क्विंटल आणि दोडक्याची १० ते १५ क्विंटल अशी आवक राहिली. ही सर्व आवक स्थानिक भागातूनच झाली. बाहेरील आवक कमीच होती. हिरव्या मिरचीला प्रतिक्विंटलला किमान १२०० रुपये, सरासरी १६०० रुपये आणि सर्वाधिक २२०० रुपये, वांग्यांना किमान ५०० रुपये, सरासरी ११०० रुपये आणि सर्वाधिक २३०० रुपये, दोडक्यांना किमान १००० रुपये, सरासरी १२०० रुपये आणि सर्वाधिक २००० रुपये असा दर मिळाला. 

ढोबळी मिरची, गवार यांनाही चांगला उठाव मिळाला. ढोबळी मिरचीची आवक ५० ते १०० क्विंटलपर्यंत रोज आवक राहिली. गवारीची आवक १० ते १२ क्विंटलपर्यंत राहिली. ढोबळ्या मिरचीला प्रतिक्विंटलला किमान ८०० रुपये, सरासरी ११०० रुपये आणि सर्वाधिक २००० रुपये, तर गवारीला किमान ३००० रुपये, सरासरी ३५०० रुपये आणि सर्वाधिक ४००० रुपये, असा दर मिळाला. गेल्या काही आठवड्यापासून त्यांची आवक आणि मागणी यात काहीशी तफावत असल्याने दरातील किरकोळ चढ-उतार वगळता दर टिकून आहेत. 

भाज्यामध्ये मेथी, कोथिंबीर, शेपूचे दरही पुन्हा स्थिर राहिले. भाज्यांची आवक प्रत्येकी १० ते १५ हजार पेंढ्यांपर्यंत राहिली. मेथीला शंभर पेंढ्यांसाठी ५०० ते ६०० रुपये, कोथिंबीर ३०० ते ४०० रुपये आणि शेपूला २५० ते ३०० रुपयापर्यंत दर  मिळाला.

कांद्याच्या दरांत चढ-उतार

कांद्याच्या आवकेत या सप्ताहात पुन्हा वाढ झाली. त्यामुळे  दरांत चढ-उतार राहिला. या सप्ताहात रोज २०० ते ३०० गाड्यांपर्यंत आवक राहिली. पण शनिवारी (ता. २५) सर्वाधिक ८०० गाड्यांपर्यंत आवक झाली. या हंगामातील एका दिवसातील ही सर्वाधिक आवक राहिली. कांद्याला प्रतिक्विंटलला किमान २०० रुपये, सरासरी १८०० रुपये आणि सर्वाधिक ३२०० रुपये असा दर मिळाला. साधारण २०० ते ४०० रुपयांच्या फरकाने त्याच्यात चढ-उतार राहिला.

ताज्या बाजार भावासाठी क्लिक करा