वैयक्तिक कौशल्य विकास प्रशिक्षणाचे अमडापूरमध्ये उद्‌घाटन

अकोला ः केंद्र शासन पुरस्कृत पंतप्रधान कौशल्य विकास योजनेअंतर्गत व छत्रपती राजाराम महाराज उद्योजकता व कौशल्‍य विकास अभियानांतर्गत अमडापूर (ता. चिखली, जि. बुलडाणा) येथील सौ. प्रमिलाताई तेजराव देशमुख कृषी तंत्र विद्यालयात वैयक्तिक कौशल्य विकास प्रशिक्षण घेतले जात आहे. प्रशिक्षणाचे नुकतेच उद्‌घाटन संस्थेचे अध्यक्ष ॲड. अशोकराव देशमुख, उपाध्यक्ष वल्लभराव देशमुख यांच्या प्रमुख उपस्थितीत झाले. या वेळी कॉलेजचे प्राचार्य पंकज कपाटे, प्रशिक्षिका माधुरी आवटे, प्रशिक्षण समन्वयक श्रीकृष्ण काटकर यांची प्रमुख उपस्थिती होती.

अमडापूर परिसरातील गावांमधील तरुणांना ‘गुणवत्ता बियाणे उत्पादक’ या विषयाचे दोन महिन्यांचे प्रशिक्षण दिले जात असून यात बीजोत्पादनाविषयी सखोल मार्गदर्शन केले जात आहे. तरुण-तरुणींना शेतीविषयक नवनवीन घटकांविषयी प्रशिक्षण देऊन त्यांचे ज्ञान व कौशल्य वाढविण्यात येणार आहे. यामुळे रोजगार, स्वयंरोजगाराच्या संधी उपलब्ध होऊ शकतील. 

या वेळी बोलताना ॲड. देशमुख म्हणाले, ‘‘पंतप्रधान कौशल्य विकास योजनेच्या माध्यमातून युवकांनी कृषी क्षेत्रात स्वतःची प्रगती करावी. बेरोजगारीवर मात करून उद्योजकतेच्या वा नोकरीच्या संधी शोधाव्यात. हा कोर्स केवळ प्रमाणपत्रासाठी न करता आपल्यातील कौशल्य वाढवावे.’

वल्लभराव देशमुख म्हणाले, ‘‘आज शेतीमध्ये तरुणांना प्रचंड संधी आहे. शेतीचे क्षेत्र सातत्याने विस्तारत आहे. बियाणे जगतात तर अधिक सजगता हवी. आपण शेतकऱ्याला चांगले बियाणे पुरविले तर तो चांगले पिकवेल. तरुणांनी आपल्यातील कौशल्यांचा वापर करून शेतकऱ्यांना मदत करावी. उपलब्ध संधीचा लाभ घ्यावा.’’

या वेळी प्राचार्य कपाटे यांनी उपक्रमांविषयी तर प्रशिक्षिका माधुरी आवटे यांनी या प्रशिक्षणाविषयी माहिती दिली. सूत्रसंचालन प्रा. किरण डुकरे यांनी केले.