`पपईचा पिकविमा योजनेत समावेश करा`

जळगाव ः खानदेशात कांद्यापाठोपाठ पपईचे क्षेत्र आहे. नंदुरबार जिल्हा पपईसाठी प्रसिद्ध असून, या जिल्ह्यात क्षेत्र वाढून ते पाच हजार हेक्टरपर्यंत पोचले आहे. पपई पिकात अनेक रोगांच्या समस्या व नैसर्गिक आपत्तीचे संकट असते. यामुळे या पिकाचा समावेश फळ पीकविमा योजनेत करावा, अशी मागणी शेतकरी करीत आहेत. 

यासंदर्भात शेतकरी प्रकाश पाटील व इतरांनी कृषिमंत्री आणि इतर प्रशासनातील मंडळीला निेवेदन दिले आहे. पपईचे क्षेत्र खानदेशात वाढले आहे. पूर्वी फक्त चार ते पाच हजार हेक्टरवर पपई असायची. शासनाने अलीकडे प्रायोगिक तत्त्वावर स्ट्रॉबेरी पिकाचा फळ पीक विमा योजनेत समावेश केला आहे. असाच समावेश पपईचादेखील करायला हवा. पपईवरही विषाणूजन्य रोग येतात. विषम वातावरणामुळे अनेकदा पीक काढून फेकावे लागते. शेतकऱ्यांचे १०० टक्के नुकसान होत असते. 

नंदुरबार जिल्ह्यात पाच हजार हेक्टरवर पपई आहे. जळगावातही सुमारे चार हजार आणि धुळ्यातही सुमारे साडेतीन हजार हेक्टरवर पपई आहे. खानदेशात एकट्या शहादा तालु्क्यात यंदा ३३९५ हेक्टरवर पपईचे पीक आहे. जळगावात चोपडा, यावल, रावेर हे तालुके पपई लागवडीत आघाडीवर असतात. पपईला विमा संरक्षण मिळाले, तर शेतकऱ्यांना पिकासंबंधी हमी, विश्वास तयार होईल. नुकसान कमी होईल, असा मुद्दा उपस्थित केला जात आहे.  पपईला विषाणूजन्य रोगांचा विळखा असतो. लाखो रुपये किडनाशकांवर खर्च करावे लागतात. अनेकदा व्यापारी मनमानी करून नुकसान करतात. यामुळे पीक परवडत नाही. पिकाचा समावेश विमा योजनेत करायला हवा.  - राकेश पाटील, शेतकरी, बामखेडा (जि.नंदुरबार)