आहारात फळे, भाज्यांचा वापर वाढवा : डॉ. शर्मा

सोलापूर : "कोरोना महामारीचे संकट सर्वांनाच त्रासदायक ठरले आहे. त्याला दूर ठेवण्यासाठी आपली प्रतिकारशक्ती उत्तम असणे आवश्‍यक आहे. त्यासाठी आपल्या आहारात फळांसह भाज्यांचा वापर वाढवण्याची आवश्‍यकता आहे,'' असे मत राष्ट्रीय डाळिंब संशोधन केंद्राच्या संचालक डॉ. ज्योत्सना शर्मा यांनी व्यक्त केले. 

खेड येथील कृषि विज्ञान केंद्राच्या वतीने अंगणवाडी सेविका आणि महिला शेतकऱ्यांसाठी पोषण आहार क्षमता वृध्दी प्रशिक्षण कार्यक्रमाचे आयोजन करण्यात आले. शबरी कृषि प्रतिष्ठानचे अध्यक्ष प्रदीप गायकवाड अध्यक्षस्थानी होते. जिल्हा परिषदेचे उपमुख्य कार्यकारी अधिकारी जावेद शेख, कृषि विज्ञान केंद्राचे प्रमुख डॉ. लालासाहेब तांबडे उपस्थित होते. 

डॉ. शर्मा म्हणाल्या, "डाळिंबाचाही मोठा उपयोग आहारामध्ये केला जावा. सोलापूर लाल हे डाळिंबाचे वाण त्यासाठी उपयुक्त आहे. डाळिंबाच्या दाण्यातील अलीगाटॅनीन घटक चांगली प्रतिकारशक्ती निर्माण करतो. त्याशिवाय लवंगही उपयुक्त आहे. टोमॅटो व बीटरूट, हिरव्या पालेभाज्या, खजूर यांचा वापर आपल्या आहारामध्ये प्राधान्याने करायला हवा. त्याशिवाय बदामाचा उपयोग ह्रदयासाठी, अक्रोडचा उपयोग मेंदुसाठी, काजूचा उपयोग किडणीसाठी होतो. '' 

महिलांचा गौरव, बियाणे किट वाटप

उत्कृष्ठ पोषण थाळी स्पर्धेच्या प्रमाणपत्रांचे वितरण झाले. अंगणवाडी मदतनीस महानंदा टोणपे यांना प्रथम क्रमांकाचे व अंगणवाडी सेविका सुनिता बारसकर यांना द्बितीय क्रमांकाचे पदक देऊन गौरवण्यात आले. परसबागेमध्ये लागवडीसाठी रोपांचे वाटप करण्यात आले.