शेतकऱ्यांमध्ये जल साक्षरतेसाठी प्रयत्न वाढवा : इंगोले

अंबाजोगाई जि. बीड : ‘‘विद्यापीठातील संशोधन कृषी विज्ञान केंद्र व कृषी विभागाच्या माध्यमातून जिल्ह्यात प्रचार व प्रसार करण्यावर भर देण्याची आवश्‍यकता आहे. दुष्काळ परिस्थितीतील ताण व्यवस्थापनासाठी शेतकऱ्यांनी ‘रुंद सरी वरंबा’ तंत्रज्ञानाचा अधिकाधिक वापर करावा. शेतकऱ्यांमध्ये जल साक्षरतेसाठी प्रयत्न वाढवावा,’’ सल्ला वसंतराव नाईक मराठवाडा कृषी विद्यापीठाचे विस्तार शिक्षण संचालक डॉ. पी. जी. इंगोले यांनी दिला.

दीनदयाल शोध संस्थान कृषी विज्ञान केंद्र अंबाजोगाई येथे वैज्ञानिक सल्लागार समितीची बैठक बुधवारी (ता. ४) झाली. अध्यक्षस्थानी प्रकल्पप्रमुख डॉ. उपेंद्र कुलकर्णी उपस्थित होते. बीडचे जिल्हा अधीक्षक कृषी अधिकारी राजेंद्र निकम, सहयोगी अधिष्ठाता कृषी महाविद्यालय अंबाजोगाईचे प्राचार्य डॉ. के. व्ही. देशमुख, कृषी विज्ञान केंद्राचे वरिष्ठ शास्त्रज्ञ डॉ. सौरभ शर्मा उपस्थित होते. 

डॉ. शर्मा म्हणाले, ‘‘केव्हीकेचा कृती आराखडा तयार करण्यासाठी तज्ज्ञांच्या आणि शेतकऱ्यांच्या सूचना व अभिप्राय घेण्यासाठी वैज्ञानिक सल्लागार समितीची बैठक झाली. सर्वांच्या सूचना कृषी विज्ञान केंद्राच्या कार्याची दिशा व दशा निश्‍चित करण्यासाठी उपयोगी असतात.’’

निकम म्हणाले, ‘‘केंद्राच्या आहार सल्ला केंद्र व शेतकरी समुपदेशन कक्षाचा शेतकऱ्यांनी लाभ घ्यावा. जिवाणू खते, ट्रायको कार्ड यांसारख्या निविष्ठांचे उत्पादन करून कृषी विभागासह शेतकऱ्यांना पुरवठा करावा. कृषी पर्यटनाला चालना देण्यासाठी जिल्ह्यात संधी आहे. बांबू शेतीसाठी शेतकऱ्यांना प्रोत्साहित करण्याची गरज आहे.’’ 

विस्तार कृषिविद्यावेत्ता अरुण गुट्टे म्हणाले, ‘‘रब्बी हंगामात अमेरिकन लष्करी अळीचा प्रादुर्भाव ज्वारीवर होण्याची शक्‍यता आहे. त्यासाठी मास-ट्रॅपिंग व रासायनिक फवारणी पद्धतीचा वापर करावा.’’ 

डॉ. कुलकर्णी म्हणाले, ‘‘भूगर्भातील जलसाठा मर्यादित असून, तो वाढविण्यासाठी जलसंधारण आवश्‍यक आहे. अनेक ठिकाणी होत असलेले वाळवंटीकरण थांबविण्यासाठी शर्थीचे प्रयत्न करणे आवश्‍यक आहे.’’

राष्ट्रऋषी नानाजी देशमुख यांनी जल व्यवस्थापनासाठी केलेल्या कार्याची माहिती त्यांनी दिली. कृषी विस्तारतज्ज्ञ सुहास पंके यांनी सूत्रसंचालन केले. कृषी अभियंता प्रमोद रेणापूरकर यांनी आभार मानले.