पलूस तालुक्यात द्राक्ष बागक्षेत्रात वाढ

पलूस, जि. सांगली : पलूस तालुक्यात द्राक्ष बागक्षेत्रात लक्षणीय वाढ झाली आहे. तालुक्यात द्राक्ष बागेचे क्षेत्र जवळजवळ दोन हजार हेक्टच्या घरात जाऊन पोचले आहे. पलूस तालुका सधन तालुका समजला जातो. तालुक्यात प्रामुख्याने ऊस हे पीक घेतले जायचे. मात्र, गेल्या काही वर्षांत येथील तरुण शेतकरी द्राक्ष शेतीकडे वळल्याचे चित्र आहे. पाच वर्षांपूर्वी एक हजार हेक्टर द्राक्ष बागाचे क्षेत्र होते. सध्या हे क्षेत्र जवळजवळ दोन हजार हेक्टरवर पोचले आहे.

द्राक्ष शेतीत आलेले नवीन तंत्रज्ञान आत्मसात करून तरुण शेतकरी द्राक्षाचे विक्रमी आणि दर्जेदार उत्पादन घेत आहेत. पूर्वी हात पंप किंवा पेट्रोल पंपाने औषध फवारणी करावी लागत होती. मात्र, आता ट्रॅक्टरने फवारणी तंत्रज्ञान आल्याने शेतकऱ्यांचा बराच त्रास कमी झाला आहे. इतरही आधुनिक तंत्रज्ञानाचा वापर होत आहे.

प्रामुख्याने सोनाका, शरद सीडलेस, तास ए गणेश, थाँमसन व इतर काही जातीच्या द्राक्षाचे उत्पादन घेतले जात आहे. स्थानिक बाजारपेठेबरोबरच मोठ्या प्रमाणावर द्राक्षाची निर्यात होत आहे. बेदाणाही मोठ्या प्रमाणावर तयार केला जातो. बेदाण्यालाही बाजारपेठ चांगली आहे. इतर कुठल्याही पिकापेक्षा कितीतरी पटीने द्राक्षातून उत्पन्न मिळते, असे द्राक्षबागायतदारांचे म्हणणे आहे.

द्राक्षाला मागणी

द्राक्षबागांचे क्षेत्र कितीही वाढले तरी, भारतातच द्राक्षाला मोठी मागणी आहे. सांगली, नाशिक, सोलापूर अशा ठराविक ठिकाणी द्राक्षाचे उत्पादन होते. त्यामुळे देशातील मागणीच्या तुलनेत उत्पादन फारच कमी आहे, असे द्राक्ष तज्ज्ञांचे मत आहे.

द्राक्ष बाग उभारणी खर्च वाढला

सध्या स्टील, मजुरी, खते, औषधे यांच्या किंमती मोठ्या प्रमाणावर वाढल्या आहेत. त्यातच बँकेत द्राक्षबाग उभारणीसाठी खरेदी साहित्याचे जीएसटी बीले सादर करावी लागतात. १८ टक्के जीएसटी, १० टक्के विमा आणि बँकेचे व्याज १० ते १२ टक्के म्हणजे बँकेचे कर्ज जवळपास ४० टक्के व्याजाने शेतकऱ्यांना घ्यावे लागते. सुरवातीचे पीक येईपर्यंत पहिल्या वर्षात दहा ते बारा लाख रुपये खर्च येतो. बँकांनी ऐच्छिक विमा करावा, अशी मागणी होत आहे.