खानदेशातील लाल कांद्याच्या आवकेत वाढ

जळगाव  ः खानदेशातील प्रमुख कृषी उत्पन्न बाजार समित्यांमध्ये लाल कांद्याची आवक या आठवड्यात वाढली आहे. दर मागील पंधरवड्यापासून कमी होत असून, प्रतिक्विंटल १२०० ते २००० रुपयांपर्यंत दर आहेत. कांदा दरात अल्प घसरण पाहायला मिळत आहे. कांदा विक्रीदेखील यामुळे वाढली आहे.  कांद्याची आवक डिसेंबरच्या सुरुवातीपर्यंत कमी होती. परंतु, गेल्या १५ ते २० दिवसांत धुळे, साक्री (जि. धुळे), पिंपळनेर (ता. साक्री), अडावद (ता. चोपडा), जळगाव, चाळीसगाव येथील बाजारात कांद्याची आवक वाढू लागली. जळगाव येथील बाजारात मागील महिन्याच्या दुसऱ्या पंधरवड्यात प्रतिदिन सरासरी ११०० क्विंटल लाल कांद्याची आवक झाली. डिसेंबरच्या सुरुवातीला ही आवक प्रतिदिन सरासरी ६०० क्विंटलपर्यंत होती. आवक फक्त जळगाव, भुसावळ, चोपडा भागांतून होत होती. परंतु, नंतर आवक वाढू लागली. अडावद, यावल तालुक्‍यांतील किनगाव येथील बाजारातही आवक वाढली आहे.  धुळे येथे या आठवड्यात प्रतिदिन सरासरी १२०० क्विंटलपर्यंत आवक झाली आहे. जळगाव येथील बाजारात प्रतिदिन सरासरी १४०० क्विंटल आवक झाली आहे. सध्या आवक जळगाव, चोपडा, यावल, भुसावळ, जामनेर, पाचोरा, औरंगाबादमधील सोयगाव, सिल्लोड, जालना आदी भागांतून होत असल्याचे सांगण्यात आले. कांद्याला जळगाव बाजार समितीत प्रतिक्विंटल १२०० ते २००० रुपयांपर्यंतचे दर आहेत. असेच दर अडावद, धुळे व पिंपळनेर भागांत आहेत. दर्जेदार कांद्याची आवक सध्या होत आहे.  दरम्यान, काही शेतकऱ्यांनी कांद्याची साठवणूक करून ठेवली होती. परंतु, दर कमी होत असल्याने शेतकरी कांदा विक्रीसाठी बाजारात आणत आहेत. कांद्याची काढणी सर्वत्र आटोपली आहे. सर्वाधिक उत्पादन साक्री, चोपडा, यावल, भुसावळ व जामनेर भागांत झाले आहे. दर कमी झाल्याने काही शेतकरी मध्य प्रदेशातील इंदूर, बडवानी येथील बाजारासह गुजरातमधील सुरत, बडोदा येथेही कांद्याची पाठवणूक करीत आहेत. तेथेही दर २८०० रुपये प्रतिक्विंटलपेक्षा अधिक नसल्याची स्थिती आहे.