डाळिंबाच्या दर्जेदार उत्पादनासाठी जमिनीतील सेंद्रिय कर्ब वाढवा

डाळिंबाच्या दर्जेदार उत्पादनासाठी जमिनीतील सेंद्रिय कर्ब वाढवा
डाळिंबाच्या दर्जेदार उत्पादनासाठी जमिनीतील सेंद्रिय कर्ब वाढवा

सोलापूर : ‘‘निर्यातक्षम डाळिंब उत्पादनासाठी पाणी, खताचे योग्य नियोजन आवश्‍यक आहे, पण त्यापेक्षाही महत्त्वाचे म्हणजे जमिनीतील सेंद्रिय कर्ब वाढवल्याशिवाय गुणवत्ता आणि उत्पादकता मिळू शकरणार नाही``, असे मत महाराष्ट्र रेसीड्यु फ्री ॲण्ड ऑरगॅनिक फार्मर्स असोसिएशनचे (मोर्फा) अध्यक्ष अंकुश पडवळे यांनी शनिवारी (ता.६) येथे व्यक्त केले.

‘सकाळ-ॲग्रोवन'तर्फे आयोजित द्राक्ष-डाळिंब प्रदर्शनात ‘निर्यातक्षम डाळिंब उत्पादन आणि गटशेती'' या विषयावर पडवळे बोलत होते. ते म्हणाले, ‘‘डाळिंबाची लागवड आणि त्याचे अंतर याचाही विचार होणे आवश्‍यक आहे. डाळिंबातील लागवड अंतर हे १५ बाय ८, १५ बाय ९ असे ठेवावे. लागवडीपूर्वी बागेमध्ये ताग, धैंचाची पेरणी करावी. १५ ते २० टक्के फुलोऱ्यात आल्यानंतर ते जमिनीत गाडावे. सेंद्रिय कर्ब वाढण्याचा जमिनीची प्रत सुधारण्यासाठी चांगला उपयोग होतो. लागवडीनंतर पहिल्या दोन वर्षांत बागेला पाणी अत्यंत मोजके आणि गरजेनुसारच द्यावे. पाण्याच्या अनियंत्रित वापरामुळेच तेलकट डागासारख्या रोगाचा प्रादुर्भाव वाढला आहे. झाडाला प्रत्यक्ष पाण्याची गरज किती? हे लक्षात घेतले जात नाही. खताच्या बाबतीतही अशीच परिस्थिती आहे. पहिल्या दोन वर्षांत रासायनिक खते अजिबात द्यायचीच नाहीत. त्याऐवजी कुजलेले शेणखत किंवा जैविक खतांचा वापर करावा.''

‘‘डाळिंबामध्ये आंतरपीक घेताना अनेकजण टोमॅटो घेतात, पण हे बुरशीजन्य रोगाला दिलेले आमंत्रण आहे. आंतरपीक घ्यायचेच असेल, तर झेंडू घ्या, अन्यथा घेऊच नका. मुख्य असणाऱ्या डाळिंब झाडालाच योग्य पद्धतीने वाढू द्या. त्याचा बहार संपल्यानंतर विश्रांतीच्या काळाचे वेगळे व्यवस्थापन करणे गरजेचे आहे. बहारानंतर पहिल्या पंधरा दिवसांत डोस द्यावा. त्यानंतर किमान तीन डोस द्यायला हवेत. झाडाला ताण देताना ३० टक्‍क्‍यांपेक्षा कमी पानगळ झाली पाहिजे,'' असेही पडवळे यांनी सांगितले. या वेळी त्यांनी निर्यातक्षम डाळिंबासाठी कराव्या लागणाऱ्या विविध मुद्द्यांची माहिती दिली. तसेच शेतकऱ्यांनी विचारलेल्या विविध प्रश्‍नांची उत्तरे दिली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com