नागपूर ः सोयाबीनच्या दरात अल्पशी वाढ वगळता कळमणा बाजार समितीत इतर शेतीमालाचे भाव स्थिर होते. सोयाबीनच्या दरात येत्या काळात फारशी वाढ अपेक्षित नसल्याचे व्यापारी सूत्रांनी सांगितले. ३०५० ते ३३५१ रुपये क्‍विंटलने सोयाबीनचे व्यवहार होत आहेत.
गेल्या आठवड्यात सोयाबीनचे व्यवहार ३०५० ते ३२५० रुपये क्‍विंटलने होत होते. त्यात किंचितशी वाढ होत हे दर ३३५१ रुपये क्‍विंटलवर पोचले. सोयाबीनची आवक गेल्या आठवड्यात अवघी ६०० क्‍विंटल असताना, ती वाढून १३०० क्‍विंटलवर पोचल्याचे सूत्रांकडून सांगण्यात आले. सोयाबीनचे दरात तेजी आली असताना, भुईमूग शेंगाचे दर मात्र खाली आले. गेल्या आठवड्यात ३००० ते ४००० रुपये क्‍विंटलचे शेंगाचे दर होते. आता हे दर ३२०० ते २६०० रुपयांपर्यंत खाली आले. शेंगाची आवक ५० ते ६० क्‍विंटल इतकी आहे. सरबती गव्हाचीदेखील बाजारात आवक असून, २५०० ते २९०० रुपये क्‍विंटलने गव्हाचे गेल्या आठवड्यात व्यवहार झाले; हे दर या आठवड्यात कायम होते.
गव्हाची सरासरी आवक २०० क्‍विंटलची आहे. लुचई तांदळाची सरासरी ५० क्‍विंटलची रोजची आवक आहे. २२०० ते २५०० रुपये क्‍विंटलवर तांदळाचे दर स्थिर आहेत. हरभरा दरदेखील खाली आले असून, ३६०० ते ४२०० रुपयांवर ते गेल्या आठवड्यात होते. या आठवड्यात हेच दर ३४०० ते ४०२६ रुपये क्‍विंटलवर आले आहेत. तुरीच्या दरातही घसरण झाल्याचे व्यापारी सूत्रांकडून सांगण्यात आले. ३४०० ते ३६५१ रुपये क्‍विंटल तुरीचे दर होते. हे दर या आठवड्यात ३४०० ते ३५६८ रुपये क्‍विंटलपर्यंत खाली आले. तुरीच्या दरात आवकेनुसार चढ-उतार होण्याचा अंदाज आहे. सद्यःस्थितीत तुरीची २०० क्‍विंटलपर्यंतची आवक आहे.
संत्रा, मोसंबीची आवक वाढली बाजारात संत्रा आणि मोसंबीची वाढती आवक आहे. मोठ्या आकाराच्या संत्रा फळांचे व्यवहार १२०० ते १५०० रुपये क्‍विंटलने होत आहेत. ७०० ते १००० क्‍विंटल अशी संत्र्यांची दर दिवसाची आवक असल्याचे व्यापाऱ्यांनी सांगितले. मध्यम आकाराची ९०० ते ११०० तर लहान आकाराच्या फळांचे व्यवहार ९०० ते १००० रुपये क्‍विंटलने होत आहेत. मोसंबीची आवकदेखील १ हजार क्‍विंटलच्या घरात आहे. १६०० ते २००० रुपये क्‍विंटलने मोसंबीचे गेल्या आठवड्यात व्यवहार होत होते. या आठवड्यातदेखील मोसंबीचे दर स्थिर होते. लहान आकाराच्या मोसंबीचे व्यवहार ८०० ते ११०० रुपये क्‍विंटलने, तर मध्यम आकाराच्या मोसंबीला १४०० ते १५०० रुपये क्‍विंटलचा दर होता.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.