आंबेगावात ठिबक, मल्चिंग पेपरच्या वापरात वाढ

संग्रहित छायाचित्र
संग्रहित छायाचित्र

महाळुंगे पडवळ, जि. पुणे : आंबेगाव तालुक्‍यातील शेतकऱ्यांनी पाण्याचा काटकसरीने वापर व्हावा, यासाठी ठिबक सिंचन व मल्चिंग पेपरच्या वापरास सुरवात केल्याचे चित्र आहे. शिवाय मल्चिंग पेपरमुळे तण उगवत नसल्याने खुरपणीचा खर्चही वाचून उत्पादन वाढीस मदत होते.

तालुक्‍यात हुतात्मा बाबू गेनू जलाशय (डिंभे धरण), घोड नदीवर असलेले कोल्हापूर पद्धतीचे बंधारे, उजवा, डावा कालवा यामुळे मोठ्या प्रमाणात पाणी उपलब्ध होऊ लागले आहे. आंबेगाव कृषी उत्पन्न बाजार समिती शेतीमाल विक्रीसाठी बाजारपेठ उपलब्ध आहे. पाण्याच्या उपलब्धतेमुळे काकडी, दुधी भोपळा, कारले, दोडका, टोमॅटो, वांगी, मिरची आदी नगदी पिके घेण्याकडे शेतकऱ्यांचा कल आहे.

पूर्वी शेतकरी पिकांना मोठ्या प्रमाणात पाटाने पाणी देत होता. त्यामुळे जमिनीचा पोत ढासळत होता, शिवाय पाण्याची नासाडीही मोठ्या प्रमाणात होत होती. परंतु तरुणांनी नोकरी न करता आधुनिक पद्धतीने शेती करण्यास सुरवात केली आहे. त्यात ठिबक सिंचन व मल्चिंग पेपरचा वापर वाढला आहे.

‘‘कळंब, साकोरे, नांदूर, चांडोली बुद्रुक, महाळुंगे पडवळ भागात उन्हाळ्यातही शाश्‍वत पाणी उपलब्ध असते. सरासरी ३० ते ४० टक्के शेतकरी ठिबक सिंचन व मल्चिंग पेपरचा वापर करत आहेत. एक एकर क्षेत्रासाठी ठिबक सिंचनासाठी ४० हजार रुपये खर्च येतो. मल्चिंग पेपरसाठी दहा हजार रुपये खर्च होत आहे.

ठिबक सिंचनामुळे पाण्यात बचत होते. शिवाय खर्चातही काटकसर झाली आहे. खतांची मात्रा थेट पिकाच्या मुळापर्यंत पोचत असल्यामुळे पिकांची जोमदार वाढ होऊन उत्पादन क्षमता वाढते,’’ अशी माहिती नांदूर येथील शेतकरी जितेंद्र विष्णू चिखले यांनी दिली. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com