खानदेशात पाणीटंचाईच्या प्रस्तावात वाढ

जळगाव : खानदेशात पाणीटंचाईचे प्रस्ताव वाढत आहेत. तात्पुरत्या योजना राबवून, विहिरींचे खोलीकरण करूनही टंचाई दूर होत नसल्याचे ग्रामस्थांचे म्हणणे आहे. कारण भूगर्भात जलसाठेच मिळत नसल्याची स्थिती आहे. कूपनलिका २०० फुटांपेक्षा अधिक खोल करता येत नसल्याने स्रोत मिळण्याबाबत अडथळे येत असल्याचे सरपंच, ग्रामस्थांचे म्हणणे आहे. सध्या खानदेशातील टंचाईच्या प्रस्तावाची संख्या सुमारे ६० पर्यंत पोचली आहे . 

नंदुरबार तालुक्‍यातील ३४ गावांमध्ये टंचाई भीषण आहे. शहादामधील पूर्व भागातही बामखेडा, जयनगर भागात टंचाई आहे. परंतु भीषण संकट नंदुरबारात आहे. विहिर अधीग्रहण, खोलीकरण व तात्पुरच्या योजना करूनही जलसंकट दूर होत नसल्याच्या तक्रारी आहेत. ही समस्या दूर करण्यासाठी टॅंकरचाच पर्याय असल्याचेही सांगण्यात आले. 

जळगाव जिल्ह्यात सुमारे ३८, धुळे व नंदुरबारात सुमारे ४५ टॅंकर सुरू आहेत. त्यात मार्चअखेरीस आणखी वाढ होऊ शकते. जळगाव जिल्ह्यात अमळनेर, पारोळा, चाळीसगाव, धरणगाव, बोदवड व जामनेरात जलसंकट वाढत आहे. धुळ्यात शिंदखेडा, साक्रीचा उत्तर भाग आणि धुळे तालुक्‍यात सर्वत्र समस्या आहे. कापडणे, न्याहळोद, लामकानी, कौठळ, तामसवाडी, मोहाडीसारख्या भागात पिण्याच्या पाण्याची समस्या आहे. जलस्त्रोत आटत आहेत. पांझरा नदीत पाणी सोडल्याने नेर, कुसुंबा भागाला अधिक लाभ होणार आहे. परंतु सर्वच गावांची समस्या सुटेल, अशी स्थिती नाही. 

अमळनेरात पांझरा व तापीकाठची गावे वगळता इतररत्र टंचाई तीव्र आहे. लोंढवे, डांगर, आंचलवाडी, मंगरूळ या गावांतील ही स्थिती आहे. टॅंकरसंबंधी ग्रामपंचायतींचे प्रस्ताव गटविकास अधिकारी, तहसील कार्यालयात येत आहेत. याबाबत प्रशासन वरिष्ठांशी चर्चा केल्यानंतर लागलीच निर्णय घेईल. तहसीलदार यांना याबाबतचे अधिकार प्रशासनाने दिले; परंतु एकाच वेळी मंजुरी मिळावी, असा उद्देश प्रशासनाचा असल्याचे सांगण्यात आले. जळगाव जिल्ह्यात ११९ गावे अधिक टंचाईग्रस्त आहेत. काही गावांमध्ये मार्चनंतर टंचाई वाढेल. यामुळे टंचाईनिधी वाढवावा लागण्याची शक्यता आहे.