पुणे जिल्ह्यातील पाणीटंचाईत वाढ

पुणे : जिल्ह्यात दुष्काळाची झळ दिवसेंदिवस वाढत असल्याने पाणीटंचाईची समस्या गंभीर होत आहे. जिल्ह्यातील टंचाई असलेल्या ३५ गावे ३७९ वाड्यांना ६१ टॅंकरद्वारे पाणीपुरवठा सुरू आहे. जिल्ह्यातील तब्बल १ लाख १८ हजार ३२० नागरिकांची तहान टॅंकरच्या पाण्यावर भागविली जात आहे, अशी माहिती जिल्हा परिषदेच्या पाणीपुरवठा विभागातर्फे देण्यात आली. टॅंकरची संख्या झपाट्याने वाढत असल्याने भविष्यातील संभाव्य दुष्काळाची दाहकता जाणवत आहे. 

परतीच्या पावसाने हुलकावणी दिल्याने कोरडवाहू भागातील छोटे तलाव, बंधारे भरलेच नाहीत. काही ठिकाणी हंगामात सरासरीपेक्षा खूपच कमी पाऊस झाला. ऐन हिवाळ्यात टॅंकरने पाणीपुरवठा करण्याची वेळ आली. जिल्ह्यातील भोर, मावळ, मुळशी आणि वेल्हा हे चार तालुके वगळता उर्वरीत ९ तालुक्‍यांत टॅंकर सुरू आहेत. बारामती तालुक्यात सर्वाधिक १९, तर शिरूर तालुक्यात १७ टॅंकर सुरू आहेत. जिल्ह्यात यात ५१ खासगी, तर १० सरकारी टॅंकर सुरू असून, १६ विहिरी आणि बोअरवेलचे अधिग्रहण करण्यात आल्याची माहिती जिल्हा परिषदेच्या ग्रामीण पाणीपुरवठा विभागाने दिली.

जिल्ह्यात पाणीटंचाईबरोबरच चारा टंचाई भासण्यास सुरवात झाली आहे. बारामती, दौंड आणि पुरंदर तालुक्यातील शेतकरी संघटना आणि संस्थाकडून चारा छावणी सुरू करण्याची मागणी करण्यात येत आहे. चारा उपलब्धतेसाठी पशुसंवर्धन विभागाकडून प्रयत्न सुरू असून, चारा उत्पादनासाठी बियाणांचे वाटप करण्यात आले आहे. अधिक चारा उत्पादन असलेल्या तालुक्यातून तो संकलित करून चारा टंचाई असलेल्या भागात पुरविण्यात येत आहे. 

तालुकानिहाय सुरू असलेली टॅंकर संख्या