बुलडाणा जिल्ह्यात ‘कोरोना’ची वाढती संख्या धोकादायक

बुलडाणा ः जिल्ह्यात ‘कोरोना’बाधितांची संख्या नऊवर जाऊन पोचली असल्याने खळबळ उडाली आहे. विदर्भात बुलडाण्यात सर्वाधित बाधित रुग्ण आढळल्याने आता रुग्ण असलेल्या तालुक्यांच्या सीमा बंद केल्या जात असून संचारबंदी कडक करण्यात आली आहे. 

बुलडाणा जिल्हा ‘कोरोना’ संसर्गाच्या बाबतीत हिटलिस्टवर आलेला आहे. २९ मार्चला बुलडाण्यात एका ‘कोरोना’ बाधिताचा मृत्यू झाल्यानंतर त्याच्या संपर्कातील तीन जणांना ‘कोरोना’ची बाधा झाल्याचे उघड झाले होते. त्यामुळे बुलडाण्याची संख्या ही चारवर पोहोचली होती. मात्र, आता दिल्लीच्या निजामुद्दीन येथून आलेल्या नागरिकांची तपासणी झाल्यानंतर त्यांच्यापैकी तब्बल चार रुग्ण ‘कोरोना’ बाधित असल्याचे रविवारी (ता. ५) स्पष्ट झाले आहे. सध्या जिल्ह्यात बाधितांची एकूण संख्या नऊ वर पोचली आहे. 

जिल्हा प्रशासनाने याची गांभिर्याने दखल घेत सर्वेक्षण मोहीम उघडली. ज्या-ज्या भागात ‘कोरोना’चा रुग्ण आढळला तो परिसर सील केल्या जात आहेत. त्या ठिकाणी रुग्णाच्या नातेवाईकासह तो ज्यांच्या संपर्कात आला त्यांची तपासणी करून अहवाल तपासणीसाठी पाठविले जात आहेत. 

सीमा सील  बुलडाणा जिल्ह्यात बुलडाणा, चिखली, देऊळगावराजा, खामगाव या तालुक्यांमध्ये ‘कोरोना’चे रुग्ण आढळून आल्याने या चारही तालुक्यांच्या सीमा बंद करण्यात आल्या आहेत. या तालुक्यातील ये-जा पूर्णपणे थांबविण्यात आली आहे. संचारबंदी कलमाची पायबंदी करणाऱ्याविरुद्ध कडक कारवाई केली जात आहे. 

शेतकऱ्यांना मोठा फटका  ‘कोराना’ रोखण्यासाठी कठोर उपाययोजना केल्या जात असून तालुक्यांच्या सीमा बंद केल्याने शेतमाल उत्पादकांना फटका बसला आहे. प्रामुख्याने भाजीपाला उत्पादक व फळ बागायतदारांची कोंडी झाली आहे. भाजीपाला विक्रीत मोठी घट आली आहे. मागणी असूनही बाजारपेठेपर्यंत भाजीपाला जात नसल्याने जागेवरच नुकसान झेलावे लागत असल्याचे शेतकरी सांगत आहेत.