‘विठ्ठल’च्या कारभाराची स्वतंत्र चौकशी करा : राजू शेट्टी

पंढरपूर, जि. सोलापूर : विठ्ठल साखर कारखान्याच्या आर्थिक डबघाईस कारखान्याचे अध्यक्ष आणि त्यांचे संचालक मंडळ जबाबदार आहेत. या लोकांनी कारखान्याचा वापर सभासदांच्या हितासाठी न करता केवळ स्वतःच्या राजकीय आणि आर्थिक हितासाठी केला आहे. कारखान्याच्या कारभाराची स्वतंत्रपणे चौकशी करावी, अशी मागणी स्वाभीमानी शेतकरी संघनटेचे नेते माजी खासदार राजू शेट्टी यांनी शुक्रवारी (ता.२४) केली. लवकरच पंढरपुरात येथील कारखान्याच्या कारभाराचा पंचनामा करण्यासाठी साखर परिषद घेतली जाणार असल्याचेही त्यांनी जाहीर केले. 

राजू शेट्टी यांच्या उपस्थितीत शुक्रवारी विठ्ठल मंदिरा समोरील नामदेव पायरी जवळ सरकारच्या कर्जमाफी धोरणाच्या विरोधात आंदोलन झाले. त्यापूर्वी त्यांनी शासकीय विश्रामगृहावर पत्रकारांशी संवाद साधला. त्यावेळी त्यांनी गुरसाळे येथील बंद पडलेल्या विठ्ठल सहकारी साखर कारखान्याच्या कारभाराची चौकशी करावी, अशी मागणी अशी मागणी केली. 

शेट्टी म्हणाले, ‘‘सहकारी साखर कारखानदारी टिकली पाहिजे, यासाठी आमचा लढ सुरु आहे. अनेक लोकांनी सहकाराचा स्वहाकार केला आहे. या लोकांनी कोटवधी रुपयांची माया जमा केली आहे. साखर कामगारांना रस्त्यावर येण्याची वेळ आली आहे. करमाळ्यात एका कामगाराने आत्मह्त्या केली. हे सहकाराचे अपयश असल्याचेही त्यांनी नमूद केले. 

मुख्यमंत्र्यांना भेटणार 

पंढरपूर भागातील अनेक साखर कारखाने यावर्षी बंद पडले आहेत. त्यास कारखान्याचे व्यवस्थापनच जबाबदार आहे. अशा लोकांच्या कारभाराचा पंचनाम केला जाईल. यासाठी पंढरपुरात स्वाभीमानी शेतकरी संघटनेच्या वतीने साखर परिषद घेतली जाईल.यामध्ये तज्ज्ञांना बोलावून शेतकर्यांना मार्गदर्शनही केले जाणार आहे. पश्‍चिम महाराष्ट्रातील नावजलेला विठ्ठल साखर कारखान्याची अवस्था पाहावत नाही. त्यामुळे आपण मुख्यमंत्री उध्दव ठाकरे यांची भेट घेवून यासंदर्भात चौकशीची मागणी करणार असल्याचेही त्यांनी सांगितले.