मका पिकात अमेरिकन लष्करी अळीचा प्रादुर्भाव

शिरपूर, जि. धुळे : जिल्ह्यात अनेक भागांत मका पिकावर अमेरिकन लष्करी अळीचा प्रादुर्भाव दिसून येत आहे. शेतकरी चिंतेत आहेत. कमी पावसाने पीक हातचे गेले आहे. तर जेथे पीक बरे आहे, तेथे नुकसान होत आहे. अळीचा प्रसार रोखण्यासाठी एकात्मिक कीड व्यवस्थापनाबाबत कृषी विभाग मार्गदर्शन करीत आहे. 

मक्याची लागवड शिरपूर, साक्री, धुळे भागांत झाली आहे. ही लागवड सुमारे १० हजार हेक्टरवर आहे. यातील ७० टक्के क्षेत्रात लष्करी अळीचा प्रकोप दिसत आहे. गेले १० दिवस शेतकरी अळी नियंत्रणासाठी कीडनाशक फवारणी व इतर उपाययोजना करीत आहेत. पण अळी नियंत्रणात येत नसल्याची स्थिती आहे. सुमारे २० ते २५ टक्के नुकसान पिकात झाले आहे. शेतकऱ्यांचा उत्पादन खर्चही वाढत आहे. विविध कंपन्यांचे अधिकारी, तज्ज्ञदेखील पाहणी करीत आहेत. कामगंध सापळे व फवारणीचा सल्ला दिला जात आहे. यामुळे उत्पादनही घटेल, अशी स्थिती आहे. शिरपूर तालुक्यात पीक अधिक असून प्रकोपही अधिक आहे. 

कृषी विभागानुसार, खरिपात मक्याची लागवड बऱ्यापैकी झाली. या पिकावर अळीचा प्रादुर्भाव झाल्याचे आढळले आहे. ही कीड बहुभक्षीय असून, तिचा प्रसार झपाट्याने होतो. तिच्या नियंत्रणासाठी कामगंध सापळ्यांचा वापर, त्याच किडीचे (स्पोडोप्टेरा फ्रुजीपर्डा) ल्यूर तसेच अंडीनाशक म्हणून पाच टक्के निंबोळी अर्काचा वापर करावा. फवारणीसाठी बिव्हेरिया बॅसियाना किंवा नोमुरिया या जैविक कीटकनाशकांचा वापर करावा. त्यामुळे ट्रायकोडर्मा व परभक्षी या नैसर्गिक शत्रूकीटकांचे संवर्धन होण्यास मदत होईल, असे कृषी विभागाने म्हटले आहे. या संदर्भात मंडल कृषी अधिकारी तुषार बैसाणे, योगेश सोनवणे, सुधीर ईशी, आर. डी. मोरे मार्गदर्शन करीत आहेत.