परभणी जिल्ह्यात गव्‍हाच्‍या ओंब्यांवर बुरशीजन्य रोगाचा प्रादुर्भाव

परभणी : जिल्ह्यातील वर्णा (ता. जिंतूर) येथील शेतात यंदाच्या हंगामात पेरणी केलेल्या गव्हाच्या विविध वाणांवर तपकिरी तांबेरा, मावा, खोडकीड आणि ओंब्यांवरील बुरशीजन्य करपा आढळून आला. त्यापैकी ओंब्यांवरील बुरशीजन्य करपा हा रोग जिल्ह्यांमध्ये प्रथमच आढळून आला आहे, असे कर्नाल (हरियाणा) आणि निफाड (जि.नाशिक) येथील गहू संशोधन केंद्राच्या शास्त्रज्ञांनी गुरुवारी (ता.१९) सांगितले.

शेतकऱ्यांनी प्रादुर्भावग्रस्त गहू पीक वसंतराव नाईक मराठवाडा कृषी विद्यापीठातील कृषी शास्‍त्रज्ञांकडे निरीक्षणासाठी पाठविले. या रोगाचे निदान करण्यासाठी गुरुवारी (ता.१९) कृषी विद्यापीठाचे विस्तार शिक्षण संचालक डॉ. डी. बी. देवसरकर, वनस्पती रोगशास्त्र विभागप्रमुख डॉ. के. टी. आपेट, विस्तार कृषी विद्यावेत्ता डॉ. यु. एन. आळसे, वनस्‍पती रोग शास्‍त्रज्ञ डॉ. एम. एस. दडके, कर्नाल (हरियाणा) येथील गहू संशोधन संचालनालयाचे डॉ. विकास गुप्ता, गहू पैदासकार डॉ. रवींद्र कुमार, राहुरी येथील महात्मा फुले कृषी विद्यापीठांतर्गत निफाड (जि. नाशिक) येथील गहू संशोधन केंद्राचे पैदासकार डॉ. एस. एस. दोडके, वनस्पती रोगशास्त्रज्ञ डॉ. भानुदास गमे, जिंतूरचे तालुका कृषी अधिकारी एस. पी. काळे आदींच्या पथकाने वर्णा येथे गहू पिकांची पाहणी केली.

वर्णा येथील शेतकऱ्यांनी गहू पिकांच्‍या जीडब्ल्यू-४९६, एमएसीएस-६२६५, एमएसीएस-२४९६ आणि जीके-७७७७ या वाणांची पेरणी केली आहे. गव्हाच्या सर्वच क्षेत्रांवर तपकिरी तांबेरा, मावा, खोडकीड आणि ओंबीवरील बुरशीजन्य करपा आढळून आला आहे.

डॉ. आपेट, डॉ. दडके व डॉ. गमे यांच्या मतानुसार तांबेरा, मावा, खोडकीड आणि ओंब्यांवरील करपा यांचा संयुक्त परिणाम म्हणून ओंब्यांवरून खालील भागाकडे वाळत गेल्या आहेत. पानातील हरितद्रव्य कमी झाल्यामुळे असा परिणाम झाल्याचे दिसून आले, असे सर्व तज्ज्ञांनी सांगितले.

गव्हाच्या काढणीनंतर काड जाळून बुरशीचे अवशेष नष्ट करावे. खोल नांगरट करावी. असा सल्ला शास्त्रज्ञांनी दिला.