विदर्भात पिकांवर कीडरोगाचा प्रादुर्भाव

नागपूर  ः विदर्भातील अनेक जिल्ह्यांमध्ये यावर्षी समाधानकारक पावसामुळे पिकांची परिस्थिती चांगली असतानाच काही भागांत कपाशीवर तुडतुड्यांचा प्रादुर्भाव दिसू लागला आहे. सोयाबीनदेखील किडी- रोगांनी पोखरल्या गेले आहे. कृषी विद्यापीठाच्या कीटकशास्त्र विभागाने मात्र कीडरोग आवाक्‍यात असल्याचा दावा करीत ते नुकसान पातळीच्या खालीच असल्याचे सांगितले.  जून महिन्यात उघडीप देणाऱ्या पावसाने त्यानंतर जोरदार कमबॅक केले. ऑगस्ट पूर्ण महिन्यात पावसाने हजेरी लावली. त्यानंतर सप्टेंबर महिन्यात देखील काही जिल्ह्यांमध्ये पाऊस कोसळत आहे. काही भागात नुसते ढगाळ वातावरणही अनुभवले जात आहे. ढगाळ वातावरणाच्या परिणामी सोयाबीन तसेच कापसावर कीडरोगाचा प्रादुर्भाव दिसू लागला आहे. सध्या कापसावर रसशोषक मावा, तुडतुडे दिसू लागले आहेत. सोयाबीनवर देखील अळ्यांचा प्रादुर्भाव असला तरी त्यांची पातळी नुकसानीच्या खाली असल्याचे सांगितले जात आहे. कपाशीवर जून महिन्यात अकोला तसेच यवतमाळ जिल्ह्यात गुलाबी बोंड अळीचा प्रादुर्भाव दिसून आला होता. त्यानंतर मात्र क्रॉपसॅप अंतर्गत कोठेच गुलाबी बोंड अळीची नोंद झाली नाही, असेही कृषी विद्यापीठाच्या कीटकशास्त्र विभागाकडून सांगण्यात आले. पावसाने उघडीप दिल्यास पूर्व विदर्भातील धान उत्पादक जिल्ह्यांमध्ये लष्करी अळी, तुडतुड्यांचा प्रादुर्भाव होण्याची शक्‍यता वर्तविली जात आहे. 

परभणी जिल्ह्यात हिरवी बोंड अळी परभणी जिल्ह्यात कापसावर हिरवी बोंड अळी दिसून आली आहे. कृषी विद्यापीठ सूत्रांकडून ही माहिती देण्यात आली. बीटी वाणांवर हिरव्या बोंड अळीचा प्रादुर्भाव असल्याचेही सूत्रांकडून सांगण्यात आले. विदर्भात मात्र हिरव्या बोंड अळीचा अद्याप शिरकाव झाला नाही, असेही सांगण्यात आले.

सध्या तरी पिकावर कीडरोगाचा प्रादुर्भाव संदर्भाने विशेष तक्रारी नाहीत. कापसावर तुडतुडे असल्याची नोंद क्रॉपसॅपमध्ये घेण्यात आली आहे. सोयाबीनवर विशेष कीडरोग संदर्भाने अद्याप तरी तक्रारी नाहीत. धानावर लष्करी अळीचा प्रादुर्भाव होऊ शकतो. - डॉ. धनराज उंदिरवाडे, विभाग प्रमुख, कीटकशास्त्र विभाग,  डॉ. पंजाबराव देशमुख कृषी विद्यापीठ, अकोला