![उसाचे एकात्मिक व्यवस्थापन महत्त्वाचे ः डॉ. बक्षी राम](http://media.assettype.com/agrowon%2Fimport%2Fnews-story%2Fcover-images%2F4PNE19P26582_org.jpg?w=480&auto=format%2Ccompress&fit=max)
कोल्हापूर : एकरी दोनशे टन ऊस उत्पादनासाठी उसाचे एकात्मिक व्यवस्थापन महत्त्वाचे आहे. शेतकऱ्यांनी यासाठी जास्तीत जास्त परिश्रम घ्यावेत, असे आवाहन ऊस प्रजनन संस्था कोईमतूरचे संचालक डॉ. बक्षी राम यांनी शिरोळ येथे केले.
शिरोळ येथील श्री दत्त साखर कारखान्याच्या वतीने राबविण्यात येणाऱ्या ‘झेप एकरी दोनशे टनाची (दत्त पॅटर्न)’ या योजनेत सहभागी झालेल्या शेतकऱ्यांच्या प्लॉटला त्यांनी भेट देऊन शेतकऱ्यांशी संवाद साधला. त्या वेळी ते बोलत होते. कारखान्याचे अध्यक्ष गणपतराव पाटील यांची प्रमुख उपस्थिती होती.
डॉ. बक्षीराम म्हणाले, दत्त कारखान्याने उत्पादन वाढीचा हा क्रांतिकारक निर्णय घेतला आहे. एकरी दोनशे टन ऊस उत्पादन सहज शक्य आहे. मात्र, यासाठी विविध पातळ्यांवर शेतकऱ्यांना काम करावे लागेल. उसाच्या चांगल्या जाती निवडणे, त्यावर ब्रीजप्रक्रीया करणे, सेंद्रीय पदार्थांचा सातत्याने जमिनीत वापर करून सेंद्रीय कर्ब वाढविणे, रुंद सरी पद्धत वापरून रोप लागवड करणे, तण व फवारण्यांचे योग्य नियोजन करणे, ठिबकचा प्रभावी वापर करणे, रोग किडीचे योग्य वेळी नियंत्रण करणे, खतांचा संतुलित वापर करून योग्य व्यवस्थापन करणे या बाबी उच्चांकी उत्पादन घेण्यासाठी अतिशय महत्त्वाच्या आहेत.
वसंतदादा शुगर इन्स्टिट्यूटचे शास्त्रज्ञ डॉ. रमेश हापसे यांनी संस्थेच्या वतीने राबविण्यात येणाऱ्या प्रोत्साहनपर योजनेची माहिती दिली. या वेळी डॉ. जुगुळ रेपाळे, डॉ. बाळकृष्ण जमदग्नी, सिदगोंडा पाटील, कार्यकारी संचालक एम. व्ही. पाटील, बाळासाहेब हलसवडे, संजय पाटील, श्री. माने, बाळासाहेब कोळी, मुख्य शेती अधिकारी श्रीशैल्य हेगाण्णा, विश्वजीत शिंदे, ए. एस. पाटील, आदीसह विविध खात्याचे प्रमुख उपस्थित होते. डॉ. बक्षी यांना जीवनगौरव पुरस्कार मिळाल्याबद्दल कारखान्यांच्या वतीने अध्यक्ष श्री. पाटील यांनी सत्कार केला.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.