एकात्मिक कीड व्यवस्थापनाने लष्करी अळीवर नियंत्रण ः डवले

नाशिक : सध्या लष्करी अळीचा प्रादुर्भाव दिसून येत आहे. त्यामुळे प्राथमिक अवस्थेतच दिसणाऱ्या अमेरिकन लष्करी अळीवर नियंत्रण आणण्यासाठी सुरुवातीला रासायनिक फवारण्या न करता नीम अर्क सारख्या फवारण्या कराव्यात. तसेच एकात्मिक कीड व्यवस्थापनाचा वापर शेतकऱ्यांनी प्रभावीपणे अवलंब करावा. यातून प्रादुर्भाव नियंत्रित होईल आणि खर्चही वाचेल, असे आवाहन राज्याचे कृषी सचिव एकनाथ डवले यांनी केले.

राज्यात कृषी विभागाच्या वतीने कृषी दिन १ जुलैपासून कृषी संजीवनी सप्ताह सुरू आहे. त्यानुसार, राज्याचे कृषी सचिव एकनाथ डवले यांनीही दौरा सुरू केला आहे. गुरुवारी (ता. २) निफाड व चांदवड तालुक्यातील विविध ठिकाणी भेटी देत त्यांनी विविध उपक्रमाची माहिती घेतली. दौऱ्यात मका पिकावरील अमेरिकन लष्करी अळी नियंत्रणासाठी कामगंध सापळे, पक्षी थांबे, निंबोळी अर्काची फवारणी या विषयी सविस्तर चर्चा करत उपस्थित शेतकऱ्यांना त्यांनी मार्गदर्शन केले.

निफाड तालुक्यातील उगाव येथे श्री. डवले यांनी श्री सेंद्रिय फळे व भाजीपाला उत्पादक गटास भेट दिली. गटामार्फत राबवण्यात येणाऱ्या सेंद्रिय शेती निविष्ठा व सेंद्रिय शेतीमाल याविषयी माहिती घेतली. ‘सेंद्रिय शेतीचे महत्त्व आणि गरज’ याविषयी शेतकऱ्यांना त्यांनी मार्गदर्शन केले.

या भेट दौऱ्यात जिल्हा अधीक्षक कृषी अधिकारी नाशिक संजीव पडवळ, निफाड उपविभागीय कृषी अधिकारी गोकुळ वाघ, आत्मा प्रकल्प उपसंचालक हेमंत काळे, निफाड तालुका कृषी अधिकारी बी. जी. पाटील, पिंपळगाव बसवंत मंडळ कृषी अधिकारी वरुण पाटील, कृषी पर्यवेक्षक श्री. गायमुखे, कृषी सहायक श्री. धर्माधिकारी या वेळी उपस्थित होते.