नांदेड : ‘‘कंधार तालुक्यातील शेतकऱ्यांनी कृषी विभागाच्या आवाहनाला प्रतिसाद देऊन यंदा सोयाबीन - तूर, तुरीच्या ओळीमध्ये एक ओळ उडीद किंवा मूग अशा पद्धतीने सुमारे ३२ हजार हेक्टर क्षेत्रावर आंतर पध्दतीचा अंगीकार शेतकऱ्यांनी केला आहे,’’ अशी माहिती तालुका कृषी अधिकारी रमेश देशमुख यांनी दिली.
कंधार तालुका बहुतांश कोरडवाहू क्षेत्राचा आहे. बारमाही सिंचनाची सुविधा अत्यंत कमी आहे. शेतकऱ्यांसाठी खरिपातील हंगाम अतिशय महत्वाचा असतो. यंदा तालुक्यात गुरुवार (ता.३०) अखेर सरासरी ३१६ मि.मी पाऊस झाला. तालुक्यात खरिपाचे सर्वसाधारण क्षेत्र ६८ हजार ३०३ हेक्टर आहे.
यंदा त्यापैकी २३ हजार ७१४ हेक्टरवर सोयाबीन, १ हजार ८६६ हेक्टरवर मूग, १ हजार ३५० हेक्टर उडीद, ५ हजार ५७५ हेक्टरवर तूर या पिकांची पेरणी झाली आहे. २६ हजार २४३ हेक्टरवर कपाशीची लागवड झाली आहे. महात्मा गांधी राष्ट्रीय रोजगार हमी योजनेअंतर्गत यावर्षी सुमारे ७० हेक्टर क्षेत्रावर आंबा, चिकू, लिंबू , डाळिंब, मोसंबी, सिताफळ या फळपिकांची लागवड झाली आहे.
कीड-रोग सर्वेक्षण व सल्ला प्रकल्प क्रॉपसॅपअंतर्गत तालुक्यातील कापूस व सोयाबीन पिकांची गावे निवडली आहेत. प्रत्येक गावांत दोन प्लॉट निवडून या प्लॉटची निरीक्षणे क्षेत्रीय अधिकारी कर्मचाऱ्यांमार्फत प्रत्येक आठवड्याला घेतली जात आहेत. कृषी विद्यापीठातील शास्त्रज्ञांच्या सल्ल्यानुसार शेतकऱ्यांना उपाययोजना सांगितल्या जात आहेत, असे देशमुख यांनी सांगितले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.