खानदेशात कांद्याची आवक वाढतच दर दबावात

जळगाव :  खानदेशात गेल्या आठवड्यात लाल कांद्याची आवक वाढली आहे. परंतु दरात घसरण सुरू असून, कोरोनामुळे बाजार समित्यांमधील रखडलेल्या लिलाव प्रक्रियेचाही फटका बसत आहे. दर गेल्या चार ते पाच दिवसात क्विंटलमागे ३५० रुपयांनी घसरून प्रतिक्विंटल ६०० ते ५५० रुपये, असे आहेत.  

नंदुरबारात १५ तारखेपर्यंत बाजार बंद आहेत. धुळ्यात आठवडी बाजार बंद आहेत. प्रमुख बाजार समित्यांमध्येच कांद्याचे लिलाव सुरू आहेत. तर काही खरेदीदार थेट शिवारातून कांद्याची खरेदी करीत आहेत. कांद्याचे दर मार्चच्या सुरवातीला १६०० रुपये प्रतिक्विंटलपेक्षा अधिक होते. तर फेब्रुवारीत सरासरी दोन हजार रुपये प्रतिक्विंटलचा दर होता.

सध्या आगाप उन्हाळ कांद्याची आवक किंवा  काढणी सुरू आहे. जळगाव जिल्ह्यातील अडावद (ता. चोपडा), किनगाव येथील बाजारात लिलाव प्रक्रिया बंदावस्थेत आहे. परंतु या भागातील व्यापारी, खरेदीदार थेट शिवारातून कांद्याची खरेदी करीत असून, त्याची पाठवणूक मोठ्या खरेदीदारांकडे करीत आहेत. खरेदी सुरू आहे. पण दरांवर दबाव वाढत असल्याने शेतकऱ्यांचे नुकसान होत आहे.

जळगाव, धुळे, पिंपळनेर (ता. साक्री) येथील बाजार समित्यांमध्ये लिलाव प्रक्रिया सुरू आहे. परंतु कोरोनामुळे लिलाव रखडत होत आहेत. जळगाव बाजार समितीत गेल्या आठवड्यात प्रतिदिन सरासरी ८०० क्विंटल लाल कांद्याची आवक झाली. तर सरासरी दर प्रतिक्विंटल ६०० रुपये, असा होता. कमी दर्जाच्या कांद्याला प्रतिक्विंटल ५५० रुपये दर मिळाला. पण सध्या दर्जेदार कांदा काढणी सुरू  आहे. याची मागणीदेखील आहे. जळगावात औरंगाबाद जिल्ह्यातील सोयगाव, सिल्लोड, जालना, बुलडाणा भागातूनही कांद्याची आवक होत आहे.