उपाशी पोटाला लॉकडाउन करता येत न्हाय...! 

रोपळे बुद्रुक, जि. सोलापूर : कोरोनाच लय भ्या वाटतंय... आमाचा जीव काय वर आलाय व्हयं... पण काय करणार उपाशी पोटाला लॉकडाउन करता येत न्हाय...! राज्यात संचारबंदी लागू झाली असतानाही कोरोनाच्या सावटाखाली मोल - मजुरीला जाणाऱ्या महिलांनी आपली व्यथा ‘सकाळ’शी संवाद साधताना व्यक्त केली. 

कोरोनाची दुसरी लाट जोरात आल्यामुळे मुख्यमंत्री उद्धव ठाकरे यांनी राज्यात संचारबंदी जाहीर केली. घरात बसून राहणाऱ्यांची उपासमार होऊ नये म्हणून गरजूंना अन्न - धान्य देण्याची घोषणा करण्यात आली. मात्र दैनंदिन गरजा भागवण्यासाठी पैशांची गरज असते. घरातील लोकांचे आजारपण असो वा खानपान असो दररोज पैशांची गरज भासत असते. म्हणून हातावरचे पोट असलेल्या लोकांना मजुरी करण्याशिवाय पर्याय नाही. रोपळे व परिसरात मोलमजुरी करणाऱ्यांची संख्या जास्त आहे. विशेषतः माहिलांना अजूनही मोलमजुरी करावीच लागत आहे. सध्या राज्यात कडक संचारबंदी लागू झाली आहे. 

आज संचारबंदीतही अनेक महिला मोल मजुरीसाठी घराबाहेर पडल्या होत्या. त्यांच्याशी ‘सकाळ’ने संवाद साधला तेव्हा आशाबाई खरे म्हणाल्या, की आमचं हातावरचं पोट हाय. घरात बसून आमची चूल पेटणार न्हाय. म्हणून मोलमजुरीला जावच लागत असल्याचे सांगितले. निर्मला खरे यांनी तर कोरोनात कामाला न्हाय गेलो तर घर खर्च कसा भागवायचा? असाच प्रतिप्रश्‍न केला. सुकमरा खरे यांनी कोरोनासाठी आम्ही तोंडाला रुमाल बांधून स्वतःची काळजी घेत असल्याचे सांगितले. 

सरकारने कोरोनाच्या काळात आमच्या सारख्या मोलमजुरी करणाऱ्या लोकांसाठी महिन्याला तीन हजार रुपयांची मदत द्यावी.  - आशाबाई खरे, महिला मजूर, रोपळे बुद्रुक, ता. पंढरपूर