अकोल्यात पाऊस सुरुच

नगर  ः अकोले तालुक्याच्या पश्चिम आदिवासी भागात दोन दिवसांपासून पाऊस सुरू होता. तो तिसऱ्या दिवशीही सुरुच आहे. मात्र पावसाचा जोर काहिसा कमी झाला आहे. 

या भागातील पावसामुळे भंडारदरा, मुळा धरणात पाण्याची आवक सुरु आहे. आतापर्यत मुळा धरण ५१ टक्क्याच्या पुढे भरले आहे.  भंडारदऱ्यात ६२ टक्के आणि निळवंडेत ५४ टक्के पाणीसाठा झाला आहे. जिल्ह्यात चांगला पाऊस पडत असला तरी अकोल्याच्या पश्चिम भागात पाऊस झाला नव्हता. मात्र, दोन दिवसांपासून या भागात जोरदार पाऊस झाला. त्यामुळे रखडलेल्या भातलावणीला वेग आला.

भंडारदरा, मुळा, निळवंडे धरणाच्या या पाणलोटात पाऊस पडत आहे. पाण्याची आवक होत आहे. मात्र, मुळा धरणात येणारा पाण्याचा विसर्ग कमी झाला आहे. शनिवारी सकाळी तीन हजार २१२ क्युसेकने पाणी येत होते. शुक्रवारी सायंकाळपासून पावसाचा जोर कमी झाला आहे. मात्र, अजून चार दिवसांनी पाऊस वाढणार असल्याचा अंदाज हवामान विभागाने वर्तविला आहे. शनिवारी सकाळी आठ वाजेपर्यत घाटघरला ८५, रतनवाडीला ७५, पांजरेला ६५, वाकीला ४७, भंडारदराला ५७, निळवंडेला १३ मिलीमीटर पावसाची नोंद झाली.