कोल्हापुरात गुळाच्या आवकेत तीस टक्क्‍यांची घट 

कोल्हापूर: येथील बाजार समितीत गेल्या हंगामाच्या तुलनेत यंदा गुळाची आवक सुमारे तीस टक्क्यांपर्यंत घटली आहे. दरात मात्र अपेक्षित वाढ झाली नाही. सध्या गुळाचे दर प्रतिक्विंटल ३२०० ते ४३०० इतके आहेत. पूर व अतिवृष्टीने नुकसान झाल्याने गुळाचा दर्जावर परिणाम होत असल्याने दर फारसे वाढत नसल्याची माहिती बाजार समितीच्या सूत्रांनी दिली.  जिल्ह्यात गूळ हंगाम सुरू होऊन महिन्याचा कालावधी लोटला आहे. यंदा पहिल्यापासूनच गुळाची आवक कमी राहिली आहे. गेल्या वर्षी डिसेंबरच्या दरम्यान दररोज पंचवीस हजार गूळ रव्यापेक्षा जास्त आवक बाजार समितीत होत होती.  यंदा हीच आवक कशी तरी पंधरा हजार गूळ रव्यापर्यंत होत आहे. यंदा हीच परिस्थिती हंगाम संपेपर्यंत राहील, अशी शक्‍यता बाजार समितीच्या वतीने व्यक्त करण्यात आली. १ एप्रिल २०१९ ते २३ डिसेंबरअखेर ७ लाख गूळ रव्याची आवक झाली आहे. गेल्या वर्षीच्या तुलनेत ही आवक तीस टक्क्यांपर्यंत घटली आहे. याचा स्पष्ट परिणाम बाजारपेठेतील उत्साहावर दिसून येत आहे. वाफसा चांगला असल्याने येत्या महिन्याभरात जलदगतीने गुऱ्हाळे सुरू होवून आवकेत किंचित वाढ होईल, असा अंदाज गूळ बाजारातील सूत्रांनी व्यक्त केला. 

कोल्हापूर बाजार समितीत गुळाला मिळणारा दर (क्विंटल) रुपयांत