कोल्हापुरात पहिल्या टप्प्यात गूळदरात वाढ

संग्रहित छायाचित्र
संग्रहित छायाचित्र

कोल्हापूर  ः यंदाच्या गूळ हंगामाला सुरवात झाली आहे. ऑक्‍टोबर ते नोव्हेंबर मध्यापर्यंत बाजारसमितीत साडेचार लाख गूळ रव्यांची आवक झाली आहे. यंदा गुळाचे उत्पादन कमी होणार हे गृहीत धरून पहिल्या टप्प्यात व्यापाऱ्यांनी गुळाच्या खरेदीला उत्साह दाखविल्याने दर समाधानकारक आहेत.

पहिल्या टप्प्यात आलेल्या गुळास ३२०० ते ४५०० रुपये क्विंटल असा दर मिळत असल्याने गूळ उत्पादकांत समाधान आहे. गेल्या वर्षीच्या सुरवातीच्या गुळाच्या तुलनेत हे भाव क्विंटलला २०० ते ३०० रुपयांनी जास्त आहेत. ही स्थिती हंगाम पूर्ण होईपर्यंत टिकावी, अशी अपेक्षा गूळ उत्पादकांची आहे. करवीर, पन्हाळा, कागल तालुक्‍यांतून गूळ आवक होत आहे. गतवर्षीच्या तुलनेत यंदा शंभर ते दोनशे रुपयांनी दर जास्त आहेत.

यंदा उसाचे प्रमाण जास्त असले तरी कोल्हापूर जिल्ह्याला ऊस वाढीच्या दृष्टीने हा हंगाम फारसा चांगला गेला नाही. गूळ उत्पादक पट्यात असणाऱ्या करवीर, पन्हाळा, कागल, गगनबावडा तालुक्‍यांत सलग तीन महिने पाऊस हटला नाही. पाणी साचून ऊस कुजून गेला. यातच कोरड्या ठिकाणी ‘हुमणी’च्या प्रादुर्भावामुळे अनेक ठिकाणच्या उसाची चिपाडे झाली. याचा एकत्रित परिणाम सध्या ऊसतोडणीवर दिसून येत आहे. प्रत्येक प्लॉटमागे अंदाजे दहा ते वीस टनांनी उसात घट कायम आहे. जिल्ह्यातील पश्‍चिम भागातील तालुक्‍यात उसाचे सरासरी उत्पादन एकरी चाळीस टनापर्यंतच आहे.

मध्यंतरीच्या प्रतिकूल परिस्थिीमुळे एकरी केवळ तीस ते पस्तीस टन इतकेच उत्पादन येत असल्याने ऊस उत्पादक हैराण झाले आहे. साहजिकच याचा परिणाम गूळ उद्योगावर झाला आहे. अशा परिस्थितीमुळे गूळ उत्पादनातही घट अपेक्षित असल्याने बाजार समितीत मोठ्या प्रमाणात गुळाची खरेदी सुरू आहे. साहजिकच चढाओढीतून गुळाचा दर सातत्याने साडेतीन ते चार हजार रुपये क्विंटलच्या आसपास आहे. अजून तीन महिने तरी बाजार समितीत गुळाची सातत्यपूर्ण आवक अपेक्षित आहे. पुढील एखाद्या महिन्यात दर काहीसे कमी आले तरी शेवटच्या टप्प्यात तरी गुळाचे दर चांगले राहतील, असा अंदाज व्यापारी सूत्रांनी व्यक्त केला.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com