जळगावात टोमॅटो, गवारीचे दर टिकून

जळगाव ः कृषी उत्पन्न बाजार समितीमध्ये टोमॅटो व गवारची आवक मागील आठवड्यात कमी राहिली. उठाव बऱ्यापैकी होता. यामुळे दर टिकून राहिले. टोमॅटोला प्रतिक्विंटल कमाल २८०० तर गवारीला ४५०० रुपये प्रतिक्विंटलचा दर मिळाला. 

गवारीची आवक मागील तीन-चार महिन्यांपासून कमी आहे. आवक फक्त एरंडोल, जामनेर, पाचोरा या भागांतून होत आहे. खरिपासंबंधी जूनच्या सुरवातीला अनेक शेतकऱ्यांनी गवारचे पीक काढून क्षेत्र रिकामे केले. त्यात कापूस व इतर पिकांची पेरणी किंवा लागवड केली. यामुळे गवारची पावसाळ्यातील आवकही रखडत सुरू आहे. शेतकऱ्यांना बऱ्यापैकी दर मिळत आहेत. 

मागील आठवड्यात गवारची प्रतिदिन दोन क्विंटल आवक झाली. त्यात संकरित गवारची सुमारे ७० ते ७५ किलो आवक होती. कूस असलेल्या किंवा गावरान गवारला ४५०० रुपये प्रतिक्विंटलचे दर मिळाले. मागील महिन्यातही दर सरासरी ४५०० रुपये प्रतिक्विंटलचेच होते. गवारची आवक पुढेही फारशी वाढणार नाही. कारण, क्षेत्र हवे तेवढे नाही. काढणी सध्या पावसाची संततधार सुरू असल्याने रखडली आहे. संकरित प्रकारच्या गवारला प्रतिक्विंटल १९०० ते २७०० रुपये प्रतिक्विंटलचे दर होते. 

टोमॅटोची स्थानिक क्षेत्रातील म्हणजेच पाचोरा, एरंडोल, जामनेर, चोपडा भागांतून होणारी आवक जवळपास निम्म्याने घटली आहे. मागील महिन्याच्या अखेरीस टोमॅटोचे दर सुधारले. ते टिकून आहेत. आवक मागील आठवड्यात प्रतिदिन नऊ क्विंटल एवढी होती. आवक जामनेर, औरंगाबाद जिल्ह्यातील सोयगाव, सिल्लोड आणि धुळे, नाशिकमधील सटाणा भागातून होत आहे. दर प्रतिक्विंटल १८०० ते २८०० रुपये, असे मिळाले. मागील महिन्याच्या तुलनेत टोमॅटोच्या दरात फारशी घसरण झालेली नसल्याचे सांगण्यात आले. स्थानिक क्षेत्रातून ऑगस्टच्या अखेरिस आवक सुरू होईल. तोपर्यंत दर टिकून राहतील, असा अंदाज बाजार समितीमधील सूत्रांनी व्यक्त केला.