जळगाव ः खानदेशात जळगाव व धुळे जिल्ह्यात सरासरीच्या ८१ टक्‍क्‍यांवर पाऊस झाला आहे. पावसामध्ये सातत्य असल्याने अनेक प्रकल्पांमधील आवक सुरूच आहे. जळगाव जिल्ह्यातील अंजनी प्रकल्पातील साठा तीन वर्षांनंतर प्लसमध्ये आला. हा प्रकल्प २१ टक्के भरला आहे; तर धुळ्यातील अमरावती व नंदुरबारमधील शिवन प्रकल्प १०० टक्के भरण्याची अपेक्षा आहे.
गेल्या आठवड्यात अनेक भागांत पावसाने हजेरी लावली. कुठेही अतिवृष्टी झालेली नाही. पिकांसाठी अनुकूल असा पाऊस पडला. गेल्या २४ तासांत सोमवारी (ता. २) सकाळी आठ वाजेपर्यंत जळगाव जिल्ह्यातील चाळीसगाव, जळगाव, पाचोरा, एरंडोल, धरणगाव, धुळ्यातील शिरपूर, साक्री, धुळे या भागातही पावसाने हजेरी लावली. नंदुरबारमधील नवापूर, तळोदा, अक्कलकुवा, धडगाव या भागातही जोरदार पाऊस झाल्याची माहिती मिळाली.
जळगाव जिल्ह्यात सरासरीच्या ८२ टक्के; तर धुळ्यातही ८० टक्‍क्‍यांवर पाऊस झाला. मागील वर्षी जळगाव जिल्ह्यात अखेरपर्यंत फक्त ६५ टक्के पाऊस पडला होता; तर धुळ्यात ६० टक्‍क्‍यांवर पाऊस झाला होता. नंदुरबार जिल्ह्यात सरासरीपेक्षा अधिक म्हणजेच १६० टक्‍क्‍यांवर पाऊस झाला आहे. पावसाचे अधिकृतपणे २८ दिवस आणखी राहिले आहेत. यामुळे पाऊस १०० टक्‍क्‍यांवर जाईल. तसेच अनेक प्रकल्प १०० टक्के भरतील, अशी अपेक्षा आहे.
गेल्या २४ तासांतील पाऊस (मिलिमीटरमध्ये) ः जळगाव जिल्हा ः चाळीसगाव १६, पाचोरा ११, एरंडोल ९, जामनेर ५, बोदवड ७. धुळे जिल्हा - शिरपूर ७, धुळे ९, साक्री ११.
अनेक प्रकल्प १०० टक्के भरले आहेत. त्यात जळगाव जिल्ह्यातील तोंडापूर, मंगरूळ, सुकी, अभोरा, धुळ्यातील पांझरा, मालनगाव, जामखेडी, बुराई, करवंद, नंदुरबारमधील दरा व रंगावली या प्रकल्पांचा समावेश आहे. गिरणा नदीवरील नाशिक जिल्ह्यातील हरणबारी व केळझर प्रकल्पदेखील १०० टक्के भरले आहेत.
धुळे जिल्ह्यातील अमरावती प्रकल्पाचा साठा वाढत असून, तो ९०.२५ टक्के आहे. तर नंदुरबारमधील शिवन प्रकल्पातील साठा ९४ टक्‍क्‍यांपर्यंत पोचला आहे. मुक्ताईनगर (जि. जळगाव) नजीकच्या तापी नदीवरील हतनूर प्रकल्पात आवक सुरूच असून, त्याचे १० दरवाजे सोमवारी सकाळी उघडे होते. तर धुळे जिल्ह्यातील अनेर प्रकल्पाचे सहा दरवाजे पूर्ण उघडण्यात आले होते. पण जळगाव जिल्ह्यातील मन्याड, अग्नावती व भोकरबारी हे प्रकल्प कोरडेच आहेत.
विविध प्रकल्पांमधील साठा (टक्के) ः गिरणा ७९.४०, वाघूर ५३, अंजनी २१, बोरी ७३.६४, बहुळा ५३.५०, हिवरा २१.९२. धुळे ः कनोली ३२.१९.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.