जळगावात गहू मळणीला वेग

गणपूर, जि. जळगाव : जिल्ह्यात गहू मळणी वेगात सुरू आहे. या हंगामात सुमारे शंभरावर मळणी यंत्रचालक, ट्रॅक्‍टरचलित यंत्रधारकांना रोजगारही मिळाला आहे. रोज सुमारे पाचशे एकर गव्हाची मळणी सुरू असल्याचा अंदाज व्यक्त केला जात आहे. बाजार समित्यांसह खेडा खरेदीलाही वेग आला आहे. बऱ्यापैकी उलाढाल होत असल्याची माहिती आहे. 

मळणीसाठी तमिळनाडू, महाराष्ट्र व पंजाबमधील हार्वेस्टर दाखल झाले आहेत. प्रतिएकर १२०० रुपये, असे दर ते घेत आहेत. तर ट्रॅक्‍टरचालक २५० रुपये प्रतिक्विंटल, या दरात मळणी करून देत आहेत. पुढील पाच ते सात दिवसांमध्ये जिल्हाभरात गव्हाची मळणी पूर्ण होईल, अशी स्थिती आहे.  

गेल्या पंधरा दिवसांपासून विविध भागांतील शिवारांमध्ये गहू मळणी वेगात सुरू आहे. धुळ्यातील शिरपूर, जळगाव जिल्ह्यांतील चोपडा, यावल, रावेर, मुक्ताईनगर, जळगाव, पाचोरा भागात पेरणी बऱ्यापैकी झाली होती. घरापर्यंत गहू आणण्यासाठी ट्रॅक्‍टर मालक पाचशे ते सहाशे रुपये भाडे घेतात. 

लोकवन गव्हाची खरेदी गावोगावी जाऊन व्यापारी करीत आहेत. शिरपूर, इंदूर (मध्य प्रदेश), जळगाव भागातील खरेदीदार गव्हाची खेडा खरेदी करीत आहेत. जागेवरच १८०० ते २००० रुपये प्रतिक्विंटलचा दर लोकवन गव्हाला मिळत आहे. जळगाव, अमळनेर, चोपडा, पाचोरा, शिरपूर, दोंडाईचा (जि. धुळे) येथील बाजारात गव्हाची आवक स्थिर असल्याचे सांगण्यात आले.