दर्गनहळ्ळी येथे वाढलाय पक्ष्यांचा किलबिलाट

सोलापूर : पूर्वी सूर्यकिरणांसोबतच पक्ष्यांचा किलबिलाट ऐकण्यास येई. परंतु, सध्या वाढत्या सिमेंटच्या जंगलामुळे अनेक पक्षी पाहण्यात येत नाहीत. यामुळे पक्ष्यांचा किलबिलाटही ऐकू येत नाही. पक्ष्यांचा किलबिलाट कायम ऐकिवात येण्याकरिता दर्गनहळ्ळी (ता. दक्षिण सोलापूर) येथील तरुण सोमनाथ बिराजदार यांनी विशेष प्रयत्न केले आहेत. सोमनाथ यांच्या प्रयत्नांनी अनेक चिमण्या येत आहेत.

उन्हाळ्यात पक्ष्यांच्या सोयीसाठी सोमनाथ यांनी आपल्या हॉटेलसमोर चारा-पाण्यासह गवताच्या वेलीचा मांडव उभा केला. त्या मांडवावर पाणी आणि धान्याने भरलेल्या प्लास्टिकच्या बाटल्या अडकविल्या. तसेच, संध्याकाळी पक्ष्यांना निवाऱ्यासाठी त्यांच्या शेतातील घरटी आणून मांडवावर अडकल्याने पक्षी निवारा घेत आहेत. सोमनाथ यांनी पक्ष्यांना लळा लावल्याने त्यांच्या हॉटेलसमोर रोज सकाळी पक्ष्यांची शाळा भरते. 

येथे रोज सकाळी १५ ते २० विविध जातीचे पक्षी येत आहेत. त्यात चिमणी, बुलबुल, सनबर्ड, शिंपी, कोकिळा, धोबी आणि साळुंकी या पक्ष्यांच्या किलबिलाटाने हा परिसर गजबजून जात आहे. सोमनाथ यांनी परिसरासमोर छोटीशी बाग तयार केली आहे. या बागेत त्यांनी विविध जातीच्या शोभिवंत फुलांच्या झाडांची लागवड केली आहे. हिरवी कंच झाडी पाहून पक्षीही या परिसराकडे आकर्षित होतात.