जत सीमा भागाला कर्नाटकातून पाणी देणार : अमित शहा

जत, जि. सांगली : ‘‘दुष्काळी जत तालुक्‍याच्या सीमावर्ती भागाला कर्नाटकातून पाणी देण्याची योजना लवकरच होईल. त्याबाबत पंतप्रधान नरेंद्र मोदी यांनी कनार्टकचे मुख्यमंत्री येडियुरप्पा यांच्याशी चर्चा केली आहे’’, अशी माहिती केंद्रीय गृहमंत्री अमित शहा यांनी दिली. 

जत येथे भाजप उमेदवार आमदार विलासराव जगताप यांच्या प्रचार सभेत शहा बोलत होते. खासदार संजयकाका पाटील, आमदार विलासराव जगताप उपस्थित होते. 

जत तालुक्‍यातील सीमावर्ती ४२ गावांना कर्नाटकातील हिरेपडसलगी योजनेतून पाणी देण्याचा विषय चर्चेत आहे. कर्नाटक आणि महाराष्ट्र सरकारमधील समन्वयाअभावी गेल्या काही वर्षांपासून हा विषय पुढे गेला नाही. त्या मुद्याला शहा यांनी हात घातला. 

 शहा म्हणाले, "सांगलीच्या जनतेने आम्हाला ताकद दिली आहे. आम्ही तुमचे प्रश्‍न सोडवणार आहोत. म्हैसाळ उपसा सिंचन योजनेची ४ हजार ९६० कोटींची सुधारित मान्यता आम्ही दिली आहे. आता कर्नाटकातून पाणी देण्याचा विषयही लवकरच मार्गी लागेल.''

"इस्लामपूरला टेक्‍सटाईल पार्क, सांगलीत बसपोर्ट, कवठेमहांकाळला ड्रायपोर्ट असा विकासाचा धडाका आम्ही लावला आहे. शेतकऱ्यांच्या खात्यात सहा हजार रुपये देऊन मोदींनी तुमच्या कष्टाला हातभार लावला आहे,'' असेही शहा यांनी सांगितले.