जत, कवठेमहांकाळ तालुक्यात चार हजार जनावरांना २२ हजार लसी

सांगली : ‘‘जिल्ह्यातील जत आणि कवठेमहांकाळ तालुक्यात जनावरांमध्ये ‘लंम्पी स्कीन’ आजाराचा प्रादुर्भाव झाला आहे. त्यामुळे जिल्हा पशुसंवर्धन विभागाने तातडीने जत तालुक्यात १८ हजार, तर कवठेमहांकाळ तालुक्यात ४ हजार जनावरांना एकूण २२ हजार लसी दिल्या आहेत’’, अशी माहिती उपायुक्त जिल्हा पशुसंवर्धन विभागातील सूत्रांनी दिली.

जिल्ह्यात १३ लाख १६ हजार जनावरांची संख्या आहे. त्यापैकी जत ३ लाख १ हजा १४५ आणि कवठेमहांकाळ तालुक्यात १ लाख ३५ हजार ५५ इतकी जनावरे आहेत. जिल्ह्यात शेतीबरोबर पशुपालन हा व्यवसाय मोठ्या प्रमाणात केला जातो. दुष्काळी पट्ट्यातील जत आणि कवठेमहांकाळ या तालुक्यासह आटपाडी, खानापूर तालुक्यात पशुपालन मुख्य व्यवसाय बनला आहे. दुग्ध व्यवसायातून शेतकऱ्यांचे घर चालते. 

दरम्यान, जिल्ह्यात गेल्या काही दिवसांपूर्वी पशुधनामध्ये ‘लंम्पी स्कीन’ आजाराचा प्रादुर्भाव झाल्याचे निदर्शनास आले होते. त्याचा प्रसार काही प्रमाणात वाढू लागला असल्याचे चित्र आहे. जत आणि कवठेमहांकाळ तालुक्यात हा प्रादुर्भाव झाला आहे.

जत तालुक्यातील ८ गावात १३ जनावरे, तर कवठेमहांकाळ तालुक्यात ४ गावात आठ जनावरांना या रोगाचा प्रादुर्भाव झाला आहे. हा रोग लवकर नियंत्रणात आला नाही, तर जनावरे दगावण्याची शक्यता आहे.  त्यामुळे पशुपालकामध्ये चिंतेचे वातावरण आहे.

जिल्हा पशुसंवर्धन उपायुक्त कार्यालयाने रोगाचा प्रादुर्भाव होताच, पशुधन विकास अधिकाऱ्यांसह डॉक्टरांची टीम या भागात पाठवली आहे. जनावरांची तपासणी करण्यास सुरवात केली आहे. ज्या गावात जनावरांना ‘लंम्पी स्कीन’चा  प्रादुर्भाव झाला आहे, त्या गावाच्या पाच किलोमीटरचा परिसरातील जनावरांना लसीकरण सुरु आहे. 

जत आणि कवठेमहांकाळ तालुक्यातील जनावरांना ‘लंम्पी स्कीन’ आजाराचा प्रादुर्भाव झाल्यानंतर लगेच उपचार सुरु केले आहेत. त्यामुळे रोग आटोक्यात आला आहे.   - डॉ. एस. एस. बेडक्याळे, उपायुक्त, जिल्हा पशुसंवर्धन, सांगली