जेजुरीची सोमवती यात्रा रद्द 

पुणे (प्रतिनिधी) ः कोरोनाचे संकट अद्यापही दूर न झाल्याने सरकारच्या नियमानुसार जेजुरी येथील खंडोबाची सोमवारी (ता. १४) होणारी सोमवती यात्रा रद्द करण्यात आली आहे. खबरदारीचा उपाय म्हणून शनिवार (ता. १२) ते सोमवारपर्यंत शहरात बाहेरील भाविकांच्या वाहनांना प्रवेश बंदी असणार आहे. त्यामुळे भाविकांनी जेजुरीत यात्रेसाठी नियोजन करू नये, असे आवाहन देवस्थान आणि स्थानिक प्रशासनाने केले आहे.  यात्रेसंदर्भात ग्रामस्थ, खांदेकरी, मानकरी, पोलिस, आणि प्रशासनाची बैठक झाली. बैठकीत कोरोच्या संकटामुळे सोमवती यात्रा रद्द केल्याचे जाहीर करण्यात आले. मात्र पारंपरिक पद्धतीने मोजक्याच ग्रामस्थ व मानकरी यांच्या उपस्थितीत धार्मिक विधी करण्याचे नियोजन केले.  कोरोनाचे संकट अद्याप कायम असल्याने वरिष्ठ पातळीवरील आदेशानुसार कलम १४४ नुसार जमावबंदी आदेश लागू केला आहे. पालखी सोहळा होणार नाही. १२ डिसेंबर ते १४ डिसेंबरपर्यंत जेजुरीत भाविकांना प्रवेश बंद राहणार आहे. त्यामुळे राज्याच्या विविध भागांतील भाविक भक्तांनी देवदर्शनासाठी जेजुरीत येऊ नये, प्रशासनाला सहकार्य करावे, असे आवाहन जेजुरी पोलिस ठाण्याचे पोलिस निरीक्षक सुनील महाडीक यांनी केले आहे. पालखी सोहळाही रद्द  प्रशासनाच्या आदेश व सूचनांचे पालन करण्यात येईल, रूढी व परंपरेनुसार श्रींचे सर्व धार्मिक विधी करण्यात येतील. मात्र पालखी सोहळा रद्द केला आहे. भाविकांनी प्रशासनाच्या आदेशानुसार १२ ते १४ डिसेंबरच्या काळात जेजुरीत येणे टाळावे, असे आवाहन मुख्य मानकरी राजेंद्र पेशवे यांनी केले आहे.