‘सीसीआय’च्या खरेदी केंद्रासाठी जिनर्सकडून निविदांचा पाऊस

कापूस खरेदी
कापूस खरेदी

जळगाव  ः खासगी जिनिंगमध्ये कापूस खरेदीसंबंधी भारतीय कापूस महामंडळाच्या (सीसीआय) सहाव्या निविदा प्रक्रियेला चांगला प्रतिसाद मिळाला असून, खानदेश व मराठवाडा विभागासंबंधी ९२ निविदा जिनर्सकडून आल्या आहेत. निविदा भरणाऱ्या कमाल जिनर्सनी प्रतिगाठ (१७० किलो रुई) १३०० रुपये दर मागितल्याची माहिती मिळाली आहे.  ‘सीसीआय’ला या प्रक्रियेत आणखी स्पर्धा हवी असून, निविदा भरण्यासाठी आणखी १५ तारखेपर्यंतची मुदतवाढ दिली आहे. ज्यांना निविदा भरल्या त्यांना लवकरच दरांसंबंधी वाटाघाटीसाठी सीसीआयच्या औरंगाबाद येथील वरिष्ठ कार्यालयात बोलाविण्यात येणार आहे. सध्या एकाच वेळी मराठवाडा, खानदेश (नगर, नाशिकसह) व विदर्भात जिनिंगमध्ये खरेदी केंद्र सुरू करण्याची निविदा प्रक्रिया राबविली जात आहे. ‘सीसीआय’च्या संकेतस्थळावर त्यासंबंधीची कार्यवाही करता येते. ‘सीसीआय’च्या मागील पाच निविदा प्रक्रियांना दरांचे वाट व नवे नियम, अटी यांमुळे प्रतिसादच मिळाला नव्हता. यामुळे खरेदीची प्रक्रिया लांबली आहे. 

जिनर्स एकवटले ‘सीसीआय’ लवकरच दरांसंबंधी वाटाघाटी करण्यासाठी बोलाविणार असल्याने जिनर्सनी महाराष्ट्र राज्य जिनिंग प्रेसिंग कारखानदार असोसिएशनच्या माध्यमातून ‘सीसीआय’शी चर्चा करण्याचा निर्णय घेतला आहे. या असोसिएशनचे अध्यक्ष भूपेंद्रसिंग राजपाल यांच्याशी त्यासंबंधीची चर्चा खानदेश, मराठवाडामधील जिनर्स करणार आहेत.  १३०० रुपयांत रुई, सरकी वेगळी करण्याची जबाबदारी मागील वर्षी सीसीआयने एका गाठीसंबंधी ७८५ रुपये दर दिला होता. परंतु त्यात घट व इतर खर्चाचा अंतर्भाव नव्हता. यंदा जिनिंगमध्ये कापूस आल्यानंतर त्यावर सर्व प्रक्रिया करून सरकी व रुई वेगळी करून, प्रेसिंगची प्रक्रिया केली जाईल. मग १७० किलोची गाठ तयार करून द्यायची आहे. जिनर्सला कापसाची तोलाई, साठवणूक, संरक्षण (ताडपत्रीने झाकणे व इतर बाबी), रुई तयार करणे, सरकी एका ठिकाणी शास्त्रशुद्ध पद्धतीने साठविणे या सर्व प्रक्रिया पूर्ण कराव्या लागतील. यासाठी आवश्‍यक सर्व मजुरी व इतर खर्च करायचा असून, यामुळे १३०० रुपये दर जिनर्सनी मागितल्याची माहिती जिनिंग प्रेसिंग असोसिएशनच्या सूत्रांनी दिली. 

प्रतिक्रिया  ‘सीसीआयक’कडे आम्ही १३०० रुपये प्रतिगाठ, असा दर मागितला आहे. त्यांच्याकडून लवकरच बोलावणे येईल. आम्ही आता ‘सीसीआय’शी राज्य असोसिएशनच्या माध्यमातून बोलणी करू. दर परवडणारे नसले तर या प्रक्रियेतून बाहेर पडू.  - अविनाश भालेराव,  जिनिंग व्यावसायिक, जळगाव

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com