खानदेशातील बाजारांमध्ये ज्वारीची आवक शून्य

जळगाव : अतिपावसामुळे खानदेशात ज्वारीचे आतोनात नुकसान झाले आहे. परिणामी, बाजारात अजूनही ज्वारीची आवक सुरू झालेली नसल्याची स्थिती आहे. 

जळगाव जिल्ह्यात जळगाव, चोपडा, अमळनेर, मुक्ताईनगर, यावल, चाळीसगाव, धरणगाव-एरंडोल, धुळ्यातील दोंडाईचा (ता.शिंदखेडा), शिरपूर, धुळे, नंदुरबारमधील शहादा, नंदुरबार या बाजार समित्या ज्वारीसाठी प्रसिद्ध आहेत. धुळ्यातील दोंडाईचा बाजारात ज्वारीची मोठी आवक दरवर्षी होते. मागील हंगामात ऑक्‍टोबरमध्येच आवक सुरू झाली होती.

अमळनेरच्या बाजारात ऑक्‍टोबरमध्ये प्रतिदिन तीन ते चार हजार क्विंटलची आवक सुरू होती. तर जळगावच्या बाजारातही प्रतिदिन तीन हजार क्विंटलपर्यंतची आवक होत होती. नोव्हेंबरअखेरपर्यंत ज्वारीची बाजार समित्यांमध्ये चांगली आवक सुरू होती. दर १५०० ते १९०० रुपये प्रतिक्विंटलपर्यंत मिळत होते. यंदा मात्र ज्वारीची कुठलीही आवक सुरू नाही. 

यावल, रावेर, जळगाव, पाचोरा, जामनेर, चाळीसगाव, धरणगाव, चोपडा, अमळनेर, धुळ्यातील शिंदखेडा, धुळे, शिरपूर, नंदुरबारमधील नंदुरबार, नवापूर आदी भागात अतिपावसामुळे ज्वारीचे नुकसान झाले आहे. कडबा काळवंडला. दाण्यांना कोंब फुटले. ज्वारीचा दर्जा एवढा घसरला आहे, की तिची मळणी करणेही अशक्‍य झाले आहे.

कणसे तशीच शेतात सोडून देण्याची वेळ शेतकऱ्यांवर आली असून अतिपावसामुळे सर्वत्र आली. जेथे ज्वारीचे पीक उभे आहे, त्या पिकात कणसांमधील दाणे आपसूकच जमिनीवर गळून पडत आहेत. त्यांची मळणी करणेही शक्‍य नाही. अशी स्थिती असल्याने बाजारात अपवाद वगळता ज्वारीची आवक सुरू झालेली नाही. पुढेही आवक होणार नाही. जळगावच्या बाजारात फक्त जालना, लातूर भागातून ज्वारीची आवक पुढे होऊ शकते, अशी शक्‍यता व्यापाऱ्यांनी व्यक्त केली. ज्वारीचा तुटवडा असल्याने काळवंडलेल्या किंवा निकृष्ट ज्वारीसही प्रतिक्विंटल १७०० रुपयांचा दर आहे.