काबुली हरभऱ्याच्या दरात किंचित सुधारणा

जळगाव : खानदेशात काबुली हरभरा दर यंदा टिकून आहेत. गेल्या दोन दिवसांत दरात क्विंटलमागे ६० ते ८० रुपयांची सुधारणा झाली आहे.  किमान ८ हजार ६० व कमाल ९ हजार ८० रुपये प्रतिक्विंटलचा दर आहे.

कोरोना संकटामुळे चोपडा, अमळनेर आदी बाजार समित्यांमध्ये खरेदीची कार्यवाही रखडत सुरू आहे. पण अनेक खरेदीदार थेट गावात किंवा जागेवर खरेदी करून घेत आहेत. थेट खरेदी धुळ्यातील शिरपूर, जळगावमधील चोपडा, यावल भागात सुरू आहे. काबुली हरभऱ्याचे उत्पादन कमी आल्याने सुरुवातीपासून बाजारात आवक कमी होती. यामुळे दर टिकून राहीले. त्यात मार्चमध्ये कोरोनाची समस्या वाढताच बाजारातील लिलाव प्रक्रिया, आवक मध्यंतरी ठप्प झाली. अनेक निर्बंध आले, अशाच बाजारातील तेजी, मागणी लक्षात घेता अनेक मोठे व्यापारी एजंटच्या मदतीने हरभऱ्याची थेट खेडा किंवा गावात जाऊन खरेदी करीत आहेत. 

काबुली हरभऱ्याची पेरणी सुमारे सात हजार हेक्टरवर झाली होती. जळगावमधील चोपडा, यावल, रावेर, जामनेर, धुळ्यातील शिरपूर आदी भागात ही पेरणी झाली होती. केळी बागांची काढणी पूर्ण झाल्यानंतर त्यात नोव्हेंबर, डिसेंबरमध्ये पेरणी झाली. काही शेतकऱ्यांनी जानेवारीतही पेरणी केली. यंदा उत्पादन एकरी साडेतीन ते चार क्विंटल आले आहे. उत्पादन कमी असतानाच सुरवातीला दर सात ते साडेसात हजार रुपये प्रतिक्विंटल, असे होते. 

बाजारातील आवक मार्चच्या सुरवातीला सुरू झाली. नंतर दरात सुधारणा होत गेली. सध्या किमान दर ८ हजार ६० व कमाल दर ९ हजार ८० रुपये प्रति क्विंटल, असा आहे. कोरोनामुळे बाजार समित्यांमधील कार्यवाहीवर सर्वत्र परिणाम झाला आहे. परंतु शिरपूर, चोपडा भागातील खरेदीदार थेट जागेवरून हरभऱ्याची खरेदी करून घेत आहेत. 

या हरभऱ्याची मागणी मध्य प्रदेश, गुजरात, दिल्ली आदी भागात आहे. शिरपूर, चोपडा, मध्य प्रदेशातील बडवानी येथील व्यापारी या हरभऱ्याची पाठवणूक पश्चिम, उत्तर भारतात करीत असल्याची माहिती मिळाली.