कडकनाथ कोंबडी वाटप योजनेची चौकशी करणार ः विश्‍वास देवकाते

पुणे : जिल्हा परिषदेतर्फे राबविण्यात आलेल्या कडकनाथ कोंबडी वाटप योजनेतील ९० टक्के कोंबड्या मेल्या आहेत. काही ठिकाणी अन्य जातीच्या कोंबड्या लाभार्थ्यांना देण्यात आल्या आहेत. राज्यात गाजत असलेल्या कडकनाथ घोटाळ्यातील पुरवठादारांनी या पक्ष्यांचा पुरवठा केला होता का? कडकनाथ अंड्यांचे उत्पादन का झाले नाही? याची सखोल चौकशी करण्याची मागणी करीत याचे पडसाद जिल्हा परिषदेच्या सर्वसाधारण सभेत उमटले. या योजनेची चौकशी करणार असल्याची घोषणा अध्यक्ष विश्‍वास देवकाते यांनी केली. 

राज्यभरात कडकनाथ कोंबडी घोटाळा गाजत आहे. या पार्श्र्वभूमीवर जिल्हा परिषदेमार्फत पुरविण्यात आलेल्या कडकनाथ कोंबड्यांचा विषय जिल्हा परिषदेत गाजला. शिवसेनेचे गटनेते देविदास दरेकर यांनी ठेकेदारांच्या वेगळ्याच जातीच्या कोंबड्यांचे वाटप करण्यात आल्याचा आरोप केला. सद्यस्थितीत ९० टक्क्यांपेक्षा अधिक कोंबड्या मेल्या असून, अपेक्षेप्रमाणे अंड्यांचे उत्पादनही मिळाले नाही. त्यामुळे ही योजनाच अपयशी ठरली आहे. कडकनाथ घोटाळ्यातील पुरवठादारांनी जिल्हा परिषदेच्या लाभार्थ्यांना पक्ष्यांचा पुरवठा केला आहे का? याची माहिती सादर करण्याची मागणी करण्यात आली. 

भाजपचे गटनेते शरद बुट्टे पाटील यांनी कडकनाथ कोंबड्यांची योजना एका वर्षात बंद करण्याचे कारण काय? ज्या लाभार्थ्यांना कोंबड्यांचे वाटप झाले, त्यांच्याकडे या कोंबड्या आहेत का? याची चौकशी करण्याची मागणी केली. सभागृहातील अनेक सदस्यांनी तक्रारी केल्या. यावर अध्यक्ष देवकाते यांनी राज्यात कडकनाथ कोंबडी घोटाळा गाजत असून, जिल्हा परिषदेने राबविलेल्या कडकनाथ कोंबडी पुरवठा योजनेची सखोल चौकशी केली जाईल, असे सभागृहाला सांगितले.